កម្មវិធីនេះមានការចូលរួមពីថ្នាក់ដឹកនាំរបស់មូលនិធិជនពិការ ប្រធាននាយកដ្ឋានសុខុមាលភាពជនពិការ គណៈអភិបាលស្រុកថ្មគោល ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្ត និងបងប្អូនជនពិការជាច្រើនរូបទៀត។

នាឱកាសនោះ ឯកឧត្តម សែម សុខា បានលើកឡើងពីការយកចិត្តទុក្ខដាក់របស់រាជរដ្ឋាភិបាលកម្ពុជាលើបងប្អូនជនពិការ ដោយបានដាក់ចេញនូវយន្តការមួយចំនួនសម្រាប់លើកម្ពស់សិទ្ធិ និងសុខុមាលភាពរបស់ជនពិការ ដើម្បីពួកគាត់មានលទ្ធភាពចូលរួមគ្រប់សកម្មភាពរបស់សង្គម។
លោកបាន បន្តថា យោងតាមអនុក្រឹត្យ ១៣៧អនក្រ.បក ចុះថ្ងៃទី២៧ ខែមិថុនា ឆ្នាំ២០១១ ស្តីពីរបគោលនយោបាយចំពោះជនពិការក្រីក្រនៅតាមសហគមន៍ និងមានការចង្អុលបង្ហាញពី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា គឺកម្មវិធីបើកផ្តល់របបគោលនយោបាយពិនិត្យ និងថែទាំសុខភាព ជូនជនពិការភាពក្រីក្រនៅតាមសហគមន៍នេះ បានចាប់ផ្តើមពីឆ្នាំ ២០១៥មក ដោយគិតមកដល់បច្ចុប្បន្នមូលនិធិជនពិការ បានបើកផ្តល់ប្រាក់ របបគោលនយោបាយនេះបានចំនួន ៥.១១៦នាក់ នៅខេត្តប៉ៃលិន ត្បូងឃ្មុំ ស្វាយរៀង កំពង់ចាម ព្រៃវែង និងកណ្តាល។

លោក ជួរ រតនៈ នាយកមូលនិធិជនពិការ បានបញ្ជាក់ថា កម្មវិធីបើកផ្តល់គោលនយោបាយពិនិត្យថែទាំសុខភាព និងបើកគណនីធនាគារនេះ បានរៀបចំឡើងជាលើកទី២ហើយ ដែលចាប់ផ្តើមពីថ្ងៃទី២២ ដល់ថ្ងៃទី២៦ ខែកក្កដា ឆ្នាំ២០១៩ សម្រាប់ជនពិការក្រីក្រចំនួន៣២៨នាក់ នៅស្រុកថ្មគោល ខេត្តបាត់ដំបង ដែលលើកទី១នោះបានរៀបចំឡើងកាលពីថ្ងៃទី៨ រហូតដល់ថ្ងៃទី១២ ខែកក្កដា ឆ្នាំ២០១៩ សម្រាប់ជនពិការក្រីក្រចំនួន ៤១៩នាក់ ក្នុងចំណោមជនពិការក្រីក្រសរុបចំនួន ២.៤៧៣នាក់ នៃស្រុកថ្មគោល។ ចំពោះជនពិការកម្រិតធ្ងន់ ដែលមិនអាចមកបើកប្រាក់របបគោលនយោបាយនេះបាន សាខាមូលនិធិជនពិការខេត្ត និងសហការជាមួយភាគីពាក់ព័ន្ធនានា នឹងបន្តបើកផ្តល់ដល់លំនៅដ្ឋានរបស់ពួកគាត់៕