ថ្លែងក្នុងកម្មវិធីនេះ ឯកឧត្តម សៅ ឡែន បានលើកឡើងពីការខិតខំរបស់រាជរដ្ឋាភិបាលក្នុងការលើកកម្ពស់សិទ្ធិ និងសុខុមាលភាពរបស់ជនពិការ តាមរយៈការដាក់ចេញនូវយន្តការនានា ដើម្បីការពារសិទ្ធិរបស់ជនពិការ លុបបំបាត់ការរើសអើងគ្រប់រូបភាព ផ្តល់ការស្តារលទ្ធភាពពលកម្មគ្រប់ប្រភេទជូនជនពិការ និងបង្កើនឱកាសដល់ជនពិការក្នុងការចូលរួមក្នុងសកម្មភាពសង្គមគ្រប់វិស័យ។ ជាពិសេសដូចអ្វីដែលមាននៅទីនេះស្រាប់ គឺក្រសួងស.អ.យ.តាមរយៈមូលនិធិជនពិការ បានរៀបចំឱ្យមានកម្មវិធីជួយគាំទ្រដល់ជីវភាពរបស់ជនពិការក្រីក្រ តាមរយៈការផ្តល់អំណោយសប្បុរសធម៌ ដោយបានប្រើប្រាស់ថវិកាដែលប្រមូលពីហិបវិភាគទានសប្បុរសធម៌របស់ ម.ជ.ព.។ ក្រៅម.ជ.ព.ក៏មានកម្មវិធីជួយគាំទ្រដល់ជនពិការក្រីក្រចំនួន២ទៀតផងដែរ រួមមាន៖ ការសាងសង់ផ្ទះ និងការផ្តល់ប្រាក់កំចីដែលមានការប្រាក់ទាប។

សម្ភារៈដែលបានផ្តល់ជូនក្នុងមួយគ្រួសារៗទទួលបានថវិកា១០ម៉ឺនរៀល អង្ករ២៥គីឡូក្រាម ត្រីខ២យួរ ទឹកត្រី១យួរ ទឹកស៊ីអ៊ីវ១យួរ អំបិលល២គីឡូក្រាម មីម៉ាម៉ា១កេះ និងសំលៀកបំពាក់១កញ្ចប់។

គូសបញ្ជាក់ថា ចាប់តាំងពីមូលនិធិជនពិការបានដំណើរការដាក់ហិបប្រាក់វិភាគទានសប្បុរសធម៌មកដល់បច្ចុប្បន្ននេះ នៅទូទាំង២៥រាជធានី-ខេត្តមានហិបចំនួន ៧០០ហិប ត្រូវបានដាក់នៅតាមទីសាធារណៈ ដោយបានទទួលថវិកាសរុបចំនួន ៨១៦.៧៩៧.៧០០រៀល ២.៧២៣ដុល្លា និង៧១.៩៣១បាត សម្រាប់យកទៅរៀបចំកញ្ចប់អំណោយសប្បុរសធម៌ចែកជូនជនពិការក្រីក្រនៅតាមសហគមន៍សរុបចំនួន ៧២៤នាក់ រួចមកហើយ៕

បន្ទាប់ពីបានចូលរួមជាអធិបតីចែកអំណោយសប្បុរសធម៌មូលនិធិជនពិការដល់ជនពិការក្រីក្រចំនួន ៣០គ្រួសារ នៅខេត្តប៉ៃលិនរួចមក ឯកឧត្ដម សៅ ឡែន អគ្គនាយកនៃអគ្គនាយកដ្ឋានកិច្ចការរដ្ឋបាល និងហិរញ្ញវត្ថុ និងជាប្រធានក្រុមប្រឹក្សាភិបាលនៃមូលនិធិជនពិការ អមដំណើរដោយគណៈកម្មការត្រួតពិនិត្យ និងវាយតម្លៃការផ្តល់ផ្ទះជូនជនពិការក្រីក្រនៅតាមសហគមន៍របស់មូលនិធិជនពិការ សហការជាមួយប្រធានមន្ទីរសង្គមកិច្ចខេត្តប៉ៃលិន អាជ្ញាធរដែនដី បានចុះពិនិត្យជាក់ស្តែងនៅលើដីលំនៅឋានរបស់ជនពិការក្រីក្រចំនួន ១រូប នៅប៉ៃលិន ដែលកំពុងរស់នៅក្នុងផ្ទះចាស់ទ្រុតទ្រោម។

គោលបំណងនៃការចុះពិនិត្យ និងវាយតម្លៃនេះគឺដើម្បីធានាថា ជនពិការក្រីក្រដែលមានលក្ខណៈវិនិច្ឆ័យស្របតាមគោលការណ៍ ស្តីពីការផ្តល់ផ្ទះជូនជនពិការក្រីក្រ នឹងត្រូវទទួលបានផ្ទះមួយខ្នងពីមូលនិធិជនពិការ៕