ទីស្តីការក្រសួង ស.អ.យ៖ ថ្ងៃព្រហស្បត្តិ៍ ៥រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី ១ ខែតុលា ឆ្នាំ២០២៦ នាយកដ្ឋានមនុស្សចាស់ និងអតីតយុទ្ធជន នៃអគ្គនាយកដ្ឋានសេវាសង្គមកិច្ច បានរៀបចំប្រារព្ធខួបលើកទី២៨ ទិវាមនុស្សចាស់កម្ពុជានិងទិវាមនុស្សចាស់អន្ដរជាតិ ថ្ងៃទី១ ខែតុលា ឆ្នាំ២០២៦ ក្រោមប្រធានបទ «ក្មេងមានកម្លាំង និងស្គាល់ផ្លូវ ឯចាស់មានបទពិសោធ» ក្រោមអធិបតីភាពដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន ប្រព្រឹត្តទៅនៅថ្ងៃទី១ ខែតុលា ឆ្នាំ២០២៦ វេលាម៉ោង ៨ : 00 នាទីព្រឹក នៅទីស្តីការក្រសួង ស.អ.យ.។
គោលបំណងនៃការប្រារព្ធទិវា
ទិវាមនុស្សចាស់កម្ពុជានិងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៦ ប្រារព្ធឡើងក្នុងគោលបំណងដើម្បីលើកកម្ពស់កិច្ចគាំពារដ៏មានប្រសិទ្ធភាព សំដៅលើកស្ទួយសុខុមាលភាពរបស់មនុស្សវ័យចាស់ឱ្យបានកាន់តែប្រសើរឡើង និងបានបង្ហាញឱ្យឃើញអំពីតួនាទីដ៏សំខាន់របស់មនុស្សវ័យចាស់ បុព្វការីជន ដែលបានបង្កើតធនធានដ៏មានសារប្រយោជន៍ ព្រមទាំងផ្ដល់នូវចំណេះដឹង ចំណេះធ្វើ បន្សល់ទុកនូវកេរដំណែលដ៏ល្អផូរផង់ និងបទពិសោធដ៏ច្រើនឥតគណនាសម្រាប់មនុស្សជំនាន់ក្រោយ។
លទ្ធផលនៃការប្រារព្ធទិវា
– ឯកឧត្តមរដ្ឋមន្ត្រី និងលោកជំទាវ បានអញ្ជើញចែកអំណោយជូនមនុស្សចាស់ចំនួន ១២០នាក់ ក្នុងម្នាក់ៗ ទទួលបានថវិកាឧបត្ថម្ភចំនួន ៦០ ០០០រៀល
– បានពិនិត្យព្យាបាលសុខភាពភ្នែកនិងផ្តល់វ៉ែនតាជូនមនុស្សចាស់
– ទទួលបានសំណូមពរពីតំណាងមនុស្សចាស់ស្នើសុំរៀបចំប្រារព្ធទិវាមនុស្សចាស់កម្ពុជានិងទិវាមនុស្សចាស់អន្តរជាតិ ថ្ងៃទី១ ខែតុលា ឱ្យបានរៀងរាល់ឆ្នាំ
– បានរៀបចំអាហារសម្រន់ និងភេសជ្ជៈជូនមនុស្សចាស់ និងសមាសភាពអញ្ជើញចូលរួមទាំងអស់
– ថ្នាក់ដឹកនាំ មន្ត្រីរាជការនៃក្រសួង ស.អ.យ. មន្ទីរ ស.អ.យ. និងសាខាមូលនិធិជាតិជំនួយសង្គម ទូទាំង ២៥ រាជធានី ខេត្ត មនុស្សចាស់ អង្គការដៃគូ និងសប្បុរសជន សមាជិក សមាជិកាអញ្ជើញចូលរួមសរុបចំនួន ៤០០នាក់ ។
សូមជ្រាបជារបាយការណ៍ សូមអរគុណ។
