ទីស្តីការគណៈរដ្ឋមន្រ្តី៖ នាព្រឹកថ្ងៃព្រហស្បតិ៍ ៤ កើត ខែស្រាពណ៍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី៨ ខែសីហា ឆ្នាំ២០២៤ តាមការចាត់តាំងដ៏ខ្ពង់ខ្ពស់របស់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម មុំ ប៊ុនថន រដ្ឋលេខាធិការទទួលបន្ទុកជួយឯកឧត្តមរដ្ឋមន្ត្រី លើការងារគាំពារមនុស្សចាស់ បានដឹកនាំប្រតិភូក្រសួងសង្គមកិច្ច អតីតយុទ្ធជន និងយុវនីតិសម្បទា ចូលរួមកិច្ចប្រជុំជាមួយ តំណាងក្រុមប្រឹក្សាអ្នកច្បាប់ ដឹកនាំដោយឯកឧត្តម សុក ផេង រដ្ឋលេខាធិការទីស្តីការគណៈរដ្ឋមន្ត្រី និងជាប្រធានអង្គប្រជុំ និងសហការី។
សមាសភាពប្រតិភូក្រសួង ស.អ.យ. ចូលរួមអមដំណើរមាន៖
១-ឯកឧត្តម សៅ ឡែន អនុរដ្ឋលេខាធិការ
២-លោក ស៊ុំ ចំរើន ប្រធាននាយកដ្ឋានមនុស្សចាស់និងអតីតយុទ្ធជន
៣-មន្រ្តីនាយកដ្ឋានមនុស្សចាស់ និងអតីតយុទ្ធជន
គោលបំណងដើម្បី៖
១-ពិនិត្យ និងពិភាក្សាលើសេចក្តីព្រាងសារាចរស្តីពី ការរៀបចំទិវាមនុស្សចាស់ ថ្ងៃទី១ ខែតុលា ឆ្នាំ២០២៤
២-ពិនិត្យ និងពិភាក្សាលើសេចក្តីព្រាងសារលិខិតសម្តេចធិបតី នាយករដ្ឋមន្ត្រី នៃកម្ពុជា ក្នុងឱកាសទិវាមនុស្សចាស់ ថ្ងៃទី១ ខែតុលា ឆ្នាំ២០២៤។
