ភ្នំពេញ៖ រសៀល ថ្ងៃទី០៤ ខែតុលា ឆ្នាំ២០២៣ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ ឯកឧត្តម ឯម ច័ន្ទមករា បានដឹកនាំកិច្ចប្រជុំផ្ទៃក្នុងជាមួយឧត្តមមន្ត្រីជំនាញផ្នែកពិការភាព និងអាស៊ានទទួលបន្ទុកសុខុមាលភាពសង្គមនិងអភិវឌ្ឍន៍កម្ពុជា ដើម្បីពិនិត្យលើខ្លឹមសារឯកសារនានាដើម្បីត្រៀមចូលរួមក្នុងវេទិកាអាស៊ានជាន់ខ្ពស់ស្តីពី “អភិវឌ្ឍន៍បរិយាបន្នពិការភាពនិងភាពជាដៃគូលើសពីឆ្នាំ២០២៥” ដែលកិច្ចប្រជុំនេះរៀបចំទ្បើងស្របគ្នាជាមួយនឹងកិច្ចសន្ទនាអាស៊ាន-អាមេរិក នៅទីក្រុងម៉ាកាសានៃសាធារណៈរដ្ឋឥណ្ឌូនេស៊ី។
បើតាមការគ្រោងទុក គណៈប្រតិភូកម្ពុជានឹងចូលរួមក្នុងកិច្ចប្រជុំខាងលើនេះ ហើយនឹងថ្លែងសុន្ទរកថាគន្លឹះក្នុងកម្មវិធីធ្វើបទអន្តរាគមន៍របស់រដ្ឋមន្ត្រីអាស៊ានទទួលបន្ទុកសង្គមកិច្ចរយៈពេល ១០នាទី។
យោងតាមរបៀបវារៈបណ្តោះអាសន្ននៃវេទិកាអាស៊ានជាន់ខ្ពស់ស្តីពីការអភិវឌ្ឍន៍បរិយាប័ន្ននិងភាពជាដៃគូលើសពីឆ្នាំ២០២៥ និងមានកិច្ចសន្ទនាជាន់ខ្ពស់អាស៊ាន-អាមេរិកស្តីពីសិទ្ធិជនមានពិការភាព ដែលនឹងពិភាក្សាលើការបញ្ជ្រាបទស្សនវិស័យពិការភាព និងរបៀបវារៈជាសកលប្រកបដោយបរិយាបន្ននៅក្នុងសសរស្តម្ភអាស៊ានទាំងបីរួមមាន៖ បញ្ហាប្រឈម កាលានុវត្ត និងឧត្តមានុវត្ត៕
