ទីស្តីការក្រសួង៖ ព្រឹកថ្ងៃពុធ ទី២៥ ខែតុលា ឆ្នាំ២០២៣ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម សុខ ប៊ុនថា បានដឹកនាំកិច្ចប្រជុំពិភាក្សាប្រមូលធាតុចូលលើសេចក្តីសង្កេតសន្និដ្ឋាននៃ របាយការណ៍លើកទី២ របស់ប្រទេសកម្ពុជាស្តីពី «ការអនុវត្តកតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គមកិច្ច និងវប្បធម៌» ដើម្បីត្រៀមចូលរួមធ្វើបទបង្ហាញ ឬបទអន្តរគមន៍ ពីផែនការអនុវត្តសេចក្តីសន្និដ្ឋានរាជរដ្ឋាភិបាល ដោយមានការអញ្ជើញចូលរួមពីអង្គភាព និងនាយកដ្ឋានពាក់ព័ន្ធរួមមានតំណាងអគ្គលេខាធិការក្រុមប្រឹក្សាជាតិកម្ពុជាដើម្បីកុមារ តំណាងអគ្គលេខាធិការក្រុមប្រឹក្សាសកម្មភាពជនពិការ តំណាងមូលនិធិជាតិជំនួយសង្គម តំណាងអគ្គនាយកសេវាសង្គមកិច្ច តំណាងអគ្គនាយកស្តារសម្បទា ប្រធាននាយកដ្ឋានកិច្ចការពារកុមារ និងតំណាងនាយកដ្ឋានសុខុមាលភាពជនពិការ។
បន្ទាប់ពីទទួលបានធាតុចូល ឯកឧត្តមប្រធានអង្គប្រជុំ នឹងដឹកនាំមន្ត្រីជំនាញបច្ចេកទេសចូលរួមធ្វើបទបង្ហាញ ឬបទអន្តរគមន៍ពីផែនការអនុវត្តសេចក្តីសន្និដ្ឋានរាជរដ្ឋាភិបាល នៅក្នុងសិក្ខាសាលាផ្សព្វផ្សាយស្តីពី «ការអនុវត្តកតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គមកិច្ច និងវប្បធម៌» នៅថ្ងៃទី៣០ ខែតុលា ឆ្នាំ២០២៣ នាពេលខាងមុខ៕
