កំពង់ចាម÷ នៅថ្ងៃទី០១ ខែវិច្ឆិកា ឆ្នាំ២០២៣ លោក ទូច វឌ្ឍនា ប្រធានមន្ទីរសង្គមកិច្ច តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានអញ្ជើញជាអធិបតីក្នុងសិក្ខាសាលាពិគ្រោះយោបល់ជាមួយភាគីពាក់ព័ន្ធស្តីពី “ការបង្កើតក្រុមមនុស្សថ្លង់ និងការគាំទ្រផ្តួចផ្តើមបង្កើតសមាគមមនុស្សថ្លង់” នាសាលប្រជុំសណ្ឋាគារភ្នំប្រុស ក្រុងកំពង់ចាម ខេត្តកំពង់ចាម។
សិក្ខាសាលានេះ មានការអញ្ជើញចូលរួមពីលោក លោកស្រីអភិបាលរងក្រុងកំពង់ចាម ចៅសង្កាត់ និងក្រុមប្រឹក្សាសង្កាត់កំពង់ចាម មេឃុំនិងក្រុមប្រឹក្សាឃុំបារាយណ៍ តំណាងកម្មវិធីអភិវឌ្ឍន៍សហប្រជាជាតិ (UNDP) នាយកប្រតិបត្តិកម្មវិធីអភិវឌ្ឍន៍មនុស្សថ្លង់នៃអង្គការម៉ារីណុល ប្រធានតំណាងអង្គការជនពិការជួយខ្លួនឯងស្រុកបាធាយ និងបងប្អូនមានពិការភាព គ-ថ្លង់ សរុបចំនួន ៣៩នាក់។
តាមរបាយការណ៍របស់លោក ទូច វឌ្ឍនា ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាបានឲ្យដឹងថា គោលបំណងនៃសិក្ខាសាលានេះ គឺស្វែងយល់ពីស្ថានភាពជនមានពិការភាពផ្នែកស្តាប់នៅក្នុងខេត្តកំពង់ចាម បង្ហាញពីសកម្មភាពជនមានពិការភាពផ្នែកស្តាប់នៅតាមសហគមន៍ដែលបានចងក្រង ស្នើសុំការគាំទ្រ និងការទទួលស្គាល់ពីអាជ្ញាធរពាក់ព័ន្ធ ចំពោះក្រុមដែលបានចងក្រងនៅក្នុងឃុំនីមួយៗ៕
