ព្រះសីហនុ៖ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុនីតិសម្បទា ឯកឧត្តម ជា សុមេធី បានដឹកនាំឥស្សរជននៃក្រសួងសង្គមកិច្ច ចុះទស្សនកិច្ច និងពិនិត្យវឌ្ឍនភាពការងាររបស់មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រះសីហនុ នាព្រឹកថ្ងៃចន្ទ ទី២៥ ខែកញ្ញា ឆ្នាំ២០២៣។
ប្រធានមន្ទីរសង្គមកិច្ច អតីតយុទ្ធជន និងយុនីតិសម្បទា លោក សម សុភា បានលើកឡើងថា ដោយមានការគាំទ្រពីក្រសួងសង្គមកចិច្ច និងរដ្ឋបាលខេត្តព្រះសីហនុ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត រួមជាមួយអង្គការដៃគូនានាបានបង្កើតឲ្យមានកិច្ចសហប្រតិបត្តិការល្អលើការផ្តល់សេវាសង្គមកិច្ច និងការអនុវត្តកម្មវិធីជំនួយសង្គមនានា ក្នុងក្របខ័ណ្ឌគោលនយោបាយគាំពារសង្គមប្រកបដោយភាពជោគជ័យដល់ជនរងគ្រោះ និងងាយរងគ្រោះក្នុងខេត្តព្រះសីហនុ ដោយមានអ្នកទទួលផលប្រមាណសរុប ១១ ៤៦៧នាក់។
លោក សម សុភា បានគូសបញ្ជាក់ថា ទិសដៅបន្តរបស់មន្ទីរសង្គមកិច្ច អតីតយុទ្ធជន និងយុនីតិសម្បទាគ្រោងបង្កើតទីតាំងមណ្ឌលសំចតដើម្បីបន្តដោះស្រាយបញ្ហាជនអនាថាដោយនឹងបង្កើតកិច្ចសហការរជាមួយអង្គការដៃគូដើម្បីផ្តល់សេវាចាំបាច់ជូនជនរងគ្រោះ និងភាពច្បាស់លាស់លើការគ្រប់គ្រងមន្ត្រីដែលកំពុងបម្រើការងារនៅសាខាមូលនិធិជាតិជំនួយសង្គម។ ពង្រឹងសមត្ថភាពកំលាំងសេវាសង្គម បង្កើនអន្តរាគមន៍ និងពង្រឹងលើការគ្រប់គ្រងករណីជនរងគ្រោះ និង បង្កើនសកម្មភាពផ្សព្វផ្សាយ យុទ្ធនាការគ្រួសាររឹងមាំ សំដៅទប់ស្កាត់ និងបង្ការអំពើហឹង្សាក្នុងគ្រួសារផងដែរ។
រដ្ឋមន្រ្តីក្រសួងសង្គមកិច្ច ឯកឧត្តម ជា សុមេធី បានកោតសរសើរនិងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ និងអង្គភាពពាក់ព័ន្ធ ដែលចូលរួមយ៉ាងសកម្មក្នុងការអនុវត្តតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ ក្នុងការរួមចំណែកអភិវឌ្ឍមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រះសីហនុប្រកបដោយភាពជោគជ័យ។
ទន្ទឹមនោះឯកឧត្តមរដ្ឋមន្ត្រី ជា សុមេធី បានលើកឡើងពីការអនុវត្តកម្មវិធីគោលនយោបាយអាទិភាពចំនួន៦ របស់រាជរដ្ឋាភិបាលនីតិកាលទី៧ សម្រាប់ប្រកាសចាប់ផ្តើមអនុវត្តមុនបំណាច់ឆ្នាំ២០២៣ ដែលជាក្តីសង្ឃឹមរបស់រាជរដ្ឋាភិបាលរួមមាន ការផ្តល់ការថែទាំសុខភាព ឆ្ពោះទៅកម្មវិធីគ្របដណ្តប់សុខភាពជាសាកល ពោលគឺ នៅពេល មានជំងឺ មន្ត្រីរាជការស៊ីវិល កម្លាំងប្រដាប់អាវុធ និងប្រជាពលរដ្ឋ ជាពិសេសពលរដ្ឋក្រីក្រនិងងាយរងគ្រោះ ត្រូវទទួលបាននូវសេវាថែទាំសុខភាពគ្រប់ៗគ្នា។ ក្នុងនោះដែរ ឯកឧត្តមរដ្ឋមន្ត្រីក៏បានបញ្ជាក់ដែលថា យុវជនដែលជាកូនអ្នកក្រីក្រ និងងាយរងគ្រោះនឹងទទួលបានការបណ្ដុះបណ្ដាលជំនាញវិជ្ជាជីវៈដោយឥតបង់ប្រាក់ ថែមទាំងទទួលបានការឧបត្ថម្ភកំឡុងពេលបណ្ដុះបណ្ដាលបន្ថែមទៀត។ ការផ្ដល់កម្មវិធីជាតិជំនួយសង្គមដល់ពលរដ្ឋក្រីក្រនិងងាយរងគ្រោះ ព្រមទាំងអ្នកប្រកបរបរក្រៅប្រព័ន្ធនឹងទទួលបានការយកចិត្តទុកដាក់ ហើយក៏អាចទទួលបានអត្ថប្រយោជន៍ដូចអ្នកប្រកបរបរក្នុងប្រព័ន្ធដែរនៅពេលដែលពួកគេជួបវិបត្តិ ឬហានិភ័យផ្សេងៗ។
ចំពោះប្រជាកសិករនឹងទទួលបាននូវការគាំពារតាមរយៈការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន (ការផ្ដល់ប្រាក់កម្ចីដើម្បីប្រកបមុខរបរកសិកម្ម)។ រាជរដ្ឋាភិបាលនឹងបញ្ជូនមន្ត្រីបច្ចេកទេសកសិកម្មទៅជួយកសិករនៅគ្រប់ឃុំ-សង្កាត់ដែលមានពលរដ្ឋប្រកបរបរកសិកម្ម និងបង្កើតសហគមន៍កសិករនៅទូទាំងប្រទេសដើម្បីការពារផលប្រយោជន៍របស់កសិករ។
ក្នុងគោលនយោបាយទាំង៦នេះមានពីរចំណុចដែលសំខាន់ទាក់ទងនឹងការងារសង្គមកិច្ចគឺ កម្មវិធីទី២ ការបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគោលនយោបាយទី៣ ការជួយដល់គ្រួសារក្រីក្រ និងងាយរងគ្រោះពីហានិភ័យ វិបិត្តិសេដ្ឋកិច្ច និងគ្រោះអាសន្ន។
ជាមួយគ្នានេះឯកឧត្តមរដ្ឋមន្ត្រីក៏បានផ្ដាំផ្ញើដល់មន្ត្រីរាជការនៃមន្ទីរសង្គមកិច្ចខេត្តព្រះសីហនុត្រូវបន្តការអនុវត្តភារកិច្ច និងការទទួលខុសត្រូវ ត្រូវរក្សាសមិទ្ធផលដែលកម្ពុជាសម្រេចបាន ពង្រឹងសាមគ្គីភាព កៀរគរធនធានបច្ចេកទេស និងហិរញ្ញវត្ថុពីសប្បុរសជននានា ម្ចាស់ជំនួយដើម្បីជំរុញអនុវត្តការងារឱ្យបានជោគជ័យ។
ឯកឧត្តមរដ្ឋមន្ត្រីក៏បានណែនាំឱ្យបង្កើនការយកចិត្តទុកដាក់លើសេវាបង្ការ ទប់ស្កាត់ និងឆ្លើយតប ពិសេសពង្រឹងការងារបណ្ដុះបណ្ដាលមន្ត្រី និងត្រូវយកចិត្តទុកដាក់បើកផ្ដល់របបសន្ដិសុខសង្គមដល់មន្ត្រីរាជការស៊ីវិល និងអតីតយុទ្ធជន (ទទួលមរណភាព) ដែលនៅសេសសល់ឱ្យបានទាន់ពេលវេលា។
រដ្ឋមន្រ្តីក្រសួងសង្គមកិច្ចឯកឧត្តម ជា សុមេធី បានគូសបញ្ជាក់ថា ឯកឧត្តមនឹងបន្តចុះជួបពិនិត្យវឌ្ឍនភាពមន្ទីរសង្គមកិច្ចតាមបណ្តាខេត្តផ្សេងៗទៀត ខណៈទីតាំងខ្លះត្រូវការអភិវឌ្ឍបន្ថែម ជាពិសេសទទួលដឹងនូវបញ្ហាប្រឈមដែលតាមមន្ទីរបានជួបប្រទះ ដើម្បីពិនិត្យដោះស្រាយ និងបណ្តុះបណ្តាលធនធានមន្រ្តីបន្ថែមទៀតដើម្បីភាពល្អប្រសើរ៕
