ខួបលើកទី ១៩ នៃទិវាគ្រួសារអន្តរជាតិ ស្តីពីគ្រួសារ ១៥ ឧសភា ឆ្នាំ២០១៣ ត្រូវបានប្រារព្ធធ្វើក្រោមអធិបតីភាព

ព្រឹកថ្ងៃទី០៩ ខែឧសភា ឆ្នាំ២០១៣ នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រាព្ធពិធីអបអរសាទរខួបអនុស្សាវរីយ៍លើកទី ១៩ នៃទិវាអន្តរជាតិស្តីពីគ្រួសារ ១៥ ឧសភា ឆ្នាំ២០១៣ ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិត អ៊ិត សំហេង រដ្ឋមន្រ្តី និងជាប្រធានគណៈកម្មការជាតិពិគ្រោះ យោបល់គោលនយោបាយចំពោះគ្រួសារ និងដោយមានតំណាងគ្រួសារចំនួន ៤៥០ នាក់ អញ្ជើញចូលរួមផងដែរ ។

លោក យិន ចំរើន តំណាងគ្រួសារដែលមានស្នាដៃល្អ បានមានប្រសាសន៍លើកឡើងអំពីជីវប្រវត្តិ និងស្ថានភាពរស់នៅរបស់ក្រុមគ្រួសារលោកតាំងពីអតីតកាល រហូតមកដល់បច្ចុប្បន្ន និងបានគូសបញ្ជាក់ថា ដោយសារគុណបុណ្យរបស់ថ្ងៃ ៧ មករា ឆ្នាំ១៩៧៩ ដែលមានសម្តេចទាំង ៣ បានក្រោកឈរដឹកនាំតស៊ូរំដោះជាតិ ឲ្យរួចផុតពីរបបប្រល័យពូជសាសន៍ ប៉ុល ពត ទើបលោក និងក្រុមគ្រួសារ បានរស់នៅប្រកបដោយសុខដុម្យរមនា មានសិទ្ធិសេរីភាព សេចក្តីថ្លៃថ្នូរ និងមានសុខសន្តិភាពពេញលេញទូទាំងប្រទេស ផ្ទុយទៅវិញ ក្នុងរបបប្រល័យពូជសាសន៍ ប៉ុល ពត គឺមានតែការកាប់សម្លាប់ជាតិសាសន៍ឯងយ៉ាងរង្គាល និងបានធ្វើឲ្យក្រុមគ្រួសារទាំងអស់ បែកបាក់ ព្រាត់ប្រាស់គ្នា និងរស់នៅយ៉ាងវេទនា ។

មានមតិស្វាគមន៍ និងសំណេះសំណាលក្នុងឱកាសនោះផងដែរ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគណៈកម្មការជាតិពិគ្រោះយោបល់គោលនយោបាយចំពោះគ្រួសារ មានប្រសាសន៍ថា ក្រសួង និងគណៈកម្មការជាតិ បានរៀបចំទិវានេះជារៀងរាល់ឆ្នាំ ហើយឆ្នាំនេះ ព្រះរាជាណាចក្រកម្ពុជាយើង ប្រារព្ធទិវាអន្តរជាតិស្តីពីគ្រួសារ ១៥ ឧសភា ក្រោមប្រធានបទ “គ្មានអំពើហឹង្សាក្នុងគ្រួសារ គ្រួសារមានសុភមង្គល សង្គមរីកចម្រើន” ក្នុងនោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសារលិខិតដ៏ខ្ពង់ខ្ពស់ ថ្លែងទៅកាន់ជនរួមជាតិទាំងអស់ ជាពិសេស មេគ្រួសារ ដែលបានខិតខំចិញ្ចឹមបីបាច់ថែរក្សា កូនចៅ ឲ្យក្លាយទៅជាពលរដ្ឋល្អក្នុងសង្គមផងដែរ ។

ឯកឧត្តមបណ្ឌិតរដ្ឋមន្ត្រី មានប្រសាសន៍ទៀតថា អ្វីដែលតំណាងគ្រួសារបានលើកឡើង គឺពិតជាត្រឹមត្រូវ បើគ្មាន ថ្ងៃ ៧ មករា ១៩៧៩ ទេ ក៏គ្មានអ្វីៗដូចសព្វថ្ងៃនេះដែរ ហើយនេះ គឺជាសច្ចៈធម៌ប្រវត្តិសាស្ត្រ ដែលគ្មានអ្នកណាអាចបំភ្លៃបាន ។ ឯកឧត្តមបណ្ឌិតរដ្ឋមន្រ្តី បានបន្តទៀតថា រាជរដ្ឋាភិបាលក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានខិតខំយកចិត្តទុកដាក់ និងចាត់វិធានការជាច្រើន ដើម្បីលើកស្ទួយកម្រិតជីវភាព រស់នៅរបស់ប្រជាពលរដ្ឋ និងសុខុមាលភាពរបស់គ្រួសារ ក្នុងគោលដៅរួមចំណែកអភិវឌ្ឍសង្គម និងធ្វើសុខដុម្យនីយកម្មគ្រួសារនៅព្រះរាជាណាចក្រកម្ពុជា ។

តមកឯកឧត្តមបណ្ឌិតរដ្ឋមន្ត្រី ក៏បានអំពាវនាវឲ្យតំណាងគ្រួសារទាំងអស់ ត្រូវបន្តធ្វើគំរូល្អនេះដល់កូនចៅបន្តទៀត ដើម្បីភាពសុខដុម្យនាក្នុងគ្រួសារ និងសង្គមជាតិទាំងមូល ជៀសវាងការប្រើអំពើហឹង្សាក្នុងគ្រួសារ និងចូលរួមផ្សព្វផ្សាយ លើកកម្ពស់ការយល់ដឹងអំពីតួនាទីដ៏មានសារៈសំខាន់នៃគ្រួសារ ដែលខិតខំប្រឹងប្រែងចិញ្ចឹមបីបាច់ថែរក្សា អប់រំ ទូន្មាន ប្រៀនប្រដៅកូនចៅ ឲ្យក្លាយទៅជាពលរដ្ឋល្អ គ្រួសារល្អ ។

ដើម្បីអបអរសាទរខួបអនុស្សាវរីយ៍លើកទី ១៩ នៃទិវាអន្តរជាតិស្តីពីគ្រួសារនេះផងដែរ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានអញ្ជើញចែកវត្ថុអនុស្សាវរីយ៍ និងថវិកាមួយចំនួន ដល់តំណាងគ្រួសារចំនួន ១០ រូប ដើម្បីជានិម្មិតរូប តំណាងគ្រួសារទាំង ៤៥០ រូបផងដែរ ៕