សៀមរាប៖ ថ្ងៃទី១៤ ខែធ្នូ ឆ្នាំ២០២១ ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានដឹកនាំប្រតិភូចុះត្រួតពិនិត្យការសាងសង់អាគារមជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប។
តាមរបាយការណ៍របស់លោក ស៊ឹម សុធន នាយកមូលនិធិជនពិការ បានឱ្យដឹងថា កន្លងមកមជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប មានការខ្វះខាតអាគារសម្រាប់ផ្តល់សេវាជូនជនពិការ ដូច្នេះហើយមូលនិធិជនពិការ ក៏បានស្នើសុំគោលការណ៍អនុញ្ញាតពីក្រសួងអាណាព្យាបាលទាំង២ ក្នុងការសាងសង់អាគារថ្មី១ខ្នងទំហំ ១២ម៉ែត្រគុណនឹង១៧ម៉ែត្រ កម្ពស់១ជាន់ មាន៥បន្ទប់។ ក្រៅពីការសាងសង់អាគារថ្មីនេះ មូលនិធិជនពិការក៏បានធ្វើការជួសជុលអាគាររដ្ឋបាល១ខ្នង អាគារផលិតកម្ម១ខ្នង អាគារបន្ទប់ស្នាក់នៅ ការិយាល័យ អាគារឃ្លាំង ជួសជុលនិងសាងសង់ថ្មីទីវាលសាធារណៈ ព្រមទាំងវាយចេញនិងសង់ថ្មីរបងមុខក្រោយដល់មជ្ឈមណ្ឌលផងដែរ។
ឯកឧត្តមរដ្ឋមន្រ្តី បានកោតសរសើរដល់ប្រធានសាខាមូលនិធិជនពិការ និងមន្រ្តីមជ្ឈមណ្ឌលស្តារខេត្តសៀមរាបទាំងអស់ ដែលបានខិតខំបំពេញការងារក្នុងគោលដៅលើកកម្ពស់គុណភាពនៃការផ្តល់សេវាក្នុងខេត្តសៀមរាបឱ្យកាន់តែប្រសើរឡើង បើទោះជាស្ថានភាពនៃការរីករាលដាលនៃជំងឺកូវីដ១៩ក្នុងខេត្តសៀមរាបកន្លងមក មានផលប៉ះពាល់ខ្លាំងយ៉ាងណាក្តី។ ជាមួយគ្នានេះ ឯកឧត្តមរដ្ឋមន្រ្តីក៏បានផ្តល់អនុសាសន៍ល្អៗជាច្រើនបន្ថែមទៀតដេីម្បីកែលម្អដល់ការសាងសង់ និងជួសជុលនេះ ឱ្យកាន់តែប្រសើឡើងទៀត៕
