រាជធានីភ្នំពេញ ៖ ថ្ងៃទី២ ខែមេសា ឆ្នាំ២០២៤ ឯកឧត្តម អ៊ុង សម្បត្តិ អគ្គលេខាធិការស្តីទីនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ ដឹកនាំមន្ត្រីជំនាញចូលរួមក្នុងកិច្ចពិភាក្សាពិនិត្យលទ្ធភាពជាដៃគូអនុវត្តគម្រោងបង្កើនវិសាលភាពសេវាកំហុសកំណុំរូបភាពនៅកម្ពុជា ដែលរៀបចំដោយមូលនិធិហ្វ្រេដហូឡូ។

កិច្ចពិភាក្សានេះមានការចូលរួមពី សំណាក់ឯកឧត្តមអគ្គនាយកគោលនយោបាយសង្គមកិច្ច ឯកឧត្តមអគ្គលេខាធិការរង ប្រធានផ្នែកនៃអ.ក.ស.ជ ប្រធាននាយកដ្ឋានសុខុមាលភាពជនពិការ ប្រធាននិងមន្ត្រីជំនាញនៃមូលនិធិហ្រ្វេដហូឡូ ដោយបានពិភាក្សាគ្នាលើគម្រោងចំនួន១០ ដូចខាងក្រោម៖

១. ធ្វើការភាពជាដៃគូជាមួយក្រុមប្រឹក្សាសកម្មភាពជនពិការ (DAC) កម្មវិធីជាតិសុខភាពភ្នែក និងក្រសួងសង្គមកិច្ច អតីតយុទ្ធជន និងយុវនីតិសម្បទា រៀបចំចងក្រងវគ្គបណ្តុះបណ្តាលដល់មន្រ្តីបម្រើការងារនៅមណ្ឌលថែទាំភ្នែក ដើម្បីជំរុញការផ្តល់សេវាកំហុសកំណុំរូបភាព ប្រកបដោយគុណភាពដល់ជនមានពិការភាព។
២. គ្រោងរៀបចំវគ្គបណ្តុះបណ្តាលស្តីពីបរិយាប័ន្នពិការភាព ដល់មន្រ្តីបម្រើការងារនៅមណ្ឌលថែទាំភ្នែក ដើម្បីផ្តល់សេវាកំហុសកំណុំរូបភាព ប្រកបដោយគុណភាពដល់ជនមានពិការភាព។
៣. សិក្សាប៉ាន់ប្រមាណ ពីតម្រូវការថែទាំភ្នែកនិងឧបសគ្គក្នុងការទទួលបានសេវារបស់ជនមានពិការភាព។
៤. ធ្វើការភាពជាដៃគូជាមួយមណ្ឌលថែទាំភ្នែក និងអ្នកពាក់ព័ន្ធនានា ដើម្បីអនុវត្តន៍សកម្មភាព ឆ្លើយតបទៅនឹងតម្រូវការ និងឧបសគ្គដែលបានរកឃើញ។
៥. ចុះពិនិត្យតាមដានដំណើរការមណ្ឌលថែទាំភ្នែក និងការវិភាគលទ្ធផល ដើម្បីស្វែងយល់ពីគុណភាពនៃការផ្តល់សេវាកំហុសកំណុំរូបភាពដល់ជនមានពិការភាព។
៦. ធ្វើការភាពជាដៃគូជាមួយ MoSVY/DAC ដើម្បីអប់រំផ្សព្វផ្សាយអំពីសុខភាពភ្នែក និងទីតាំងទទួលសេវា (មណ្ឌលថែទាំភ្នែក)។
៧. ធ្វើការភាពជាដៃគូជាមួយ MoSVY/DAC  ដើម្បីរៀបចំកម្មវិធីពិនិត្យភ្នែកដល់ជនមានពិការភាព នៅក្នុងទិវាជនពិការអន្តរជាតិ និងទិវាផ្សេងៗ។
៨. ធ្វើការភាពជាដៃគូជាមួយនាយកដ្ឋានផែនការនិងព័ត៌មានវិទ្យានៃក្រសួងសុខាភិបាល ដើម្បីពង្រឹងការប្រមូលទិន្នន័យជនមានពិការភាព ក្នុងប្រព័ន្ធសុខាភិបាល ដោយសហការជាមួយដៃគូអភិវឌ្ឍន៍ និងអ្នកពាក់ព័ន្ធនានា។
៩. ពង្រឹងមន្រ្តីបំរើការងារនៅមណ្ឌលថែទាំភ្នែក ក្នុងការប្រមូលទិន្នន័យ ជនមានពិការភាព ប្រកបដោយសុក្រិត្យភាព ( WGSS )។
១០. ចងក្រងមេរៀនជាបទពិសោធន៍ ក្នុងការប្រតិបត្តិការមណ្ឌលថែទាំភ្នែក។

បន្ទាប់ពីបានពិនិត្យលើសកម្មភាពចម្បងៗរួចមក តំណាងអង្គភាពទាំងបីបានឯកភាពគ្នាយកសកម្មភាពនីមួយៗដើម្បីរៀបចំ និងរៀបចំផែនការសកម្មភាពលម្អិត និងគោរពស្នើសុំគោលការណ៍ដ៏ខ្ពង់ខ្ពស់ពីថ្នាក់ដឹកនាំដើម្បីសម្រេច៕