ភ្នំពេញ៖ នៅព្រឹកថ្ងៃសុក្រ ទី១ ខែធ្នូ ឆ្នាំ២០២៣នេះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញចូលរួមកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីពិភាក្សានិងឆ្លងរបៀបវារៈចំនួន៤។
របៀបវារៈដែលត្រូវពិភាក្សា និងពិនិត្យនៅព្រឹកថ្ងៃនេះរួមមាន៖ របាយការណ៍ស្តីពីវឌ្ឍនភាពនៃការអនុវត្តវិធានការគន្លឹះក្នុងវិស័យអប់រំ របាយការណ៍ស្តីពីវឌ្ឍនភាពនៃការរៀបចំនិងការអនុវត្តវិធានការគន្លឹះក្នុងវិស័យសុខាភិបាល សេចក្តីព្រាងគោលនយោបាយជាតិស្តីពីកម្មសិទ្ធិបញ្ញា ឆ្នាំ២០២៤- ២០២៨ និងបញ្ហាផ្សេងៗ។
សម្តេចនាយករដ្ឋមន្ត្រីបានគូសបញ្ជាក់ថា វិធានការគន្លឹះក្នុងវិស័យអប់រំ និងសុខាភិបាល គឺស្ថិតនៅក្នុងចំណោមវិធានការគន្លឹះចំនួន៥ដែលរាជរដ្ឋាភិបាលបានដាក់ចេញក្នុងរាជរដ្ឋាភិបាលអណត្តិទី៧នេះ បន្ថែមពីលើក្របខណ្ឌយុទ្ធសាស្ត្រដែលមានស្រាប់ ដូចជាយុទ្ធសាស្ត្របញ្ចកោណដំណាក់ទី១ជាដើម៕
