ខេត្តបន្ទាយមានជ័យ ៖ នាថ្ងៃអង្គារ ៥កើត ខែជេស្ឋ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១១ ខែ មិថុនា ឆ្នាំ២០២៤ លោក ង៉ោ ម៉េងជ្រួន អភិបាលរងនៃគណៈអភិបាលខេត្ត តំណាងដ៏ខ្ពង់ខ្ពស់ឯកឧត្តមអភិបាលនៃគណៈអភិបាលខេត្តអញ្ជើញជាគណៈអធិបតីក្នុងពិធី “អបអរសាទរខួបលើកទី៧៥ ទិវាកុមារអន្តរជាតិ ១ មិថុនា ខួបលើកទី២៣ ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៤” ក្រោមប្រធានបទ “ការវិនិយោគលើកុមារថ្ងៃនេះសំដៅបង្កើនមូលធនមនុស្សក្នុងយុគសម័យបរិវត្តកម្មឌីជីថល” និង “រួមគ្នាអនុវត្តការប្តេជ្ញាចិត្តដើម្បីបញ្ចប់ទម្រង់ធ្ងន់ធ្ងរនៃពលកម្មកុមារ” ដែលរៀបចំឡើងដោយ មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តបន្ទាយមានជ័យ ស្ថិតក្នុងភូមិអូរឫស្សីលើ សង្កាត់អូរឫស្សី ក្រុងប៉ោយប៉ែត ខេត្តបន្ទាយមានជ័យ នៅក្នុងទីតាំងអង្គការក្ដីស្រឡាញ់គ្មានព្រំដែន ដែលមានភ្ញៀវកិត្តិយសចូលរួម ចំនួន ៣៧នាក់ និងសិស្សានុសិស្សចូលរួមចំនួន៤២០នាក់ ដោយម្នាក់ៗទទួលបាន៖
-សៀវសរសេរ ៥ក្បាល
-ប៊ិចសរសេរ៥ដើម
-ទឹកសុទ្ធ១ដប
-ថវិកា ៥,០០០រៀល
-អ្នកគ្រូចំនួន ៣០នាក់ ក្នុងម្នាក់ៗទទួលបានថវិកា ៥០,០០០រៀល ដែលជាអំណោយរបស់ ឯកឧត្តមអភិបាលនៃគណៈអភិបាលខេត្តបន្ទាយមានជ័យ។
នាឱកាសនោះ លោកអភិបាលរងខេត្ត បានសំណូមពរ ដល់សិស្សានុសិស្ស កុមារា កុមារី ឱ្យខិតខំរៀនសូត្រ ស្ដាប់បង្គាប់លោកគ្រូ អ្នកគ្រូ ឪពុក ម្ដាយ និងជៀសឆ្ងាយពីគ្រឿងញៀន។
