បាត់ដំបង÷ នៅថ្ងៃពុធ ទី១១ ខែតុលា ឆ្នាំ២០២៣ ឯកឧត្តម ឌីន បូរី អគ្គនាយកសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីបិទវគ្គបណ្តុះបណ្តាលលើគោលនយោបាយ និងបទដ្ឋានអប្បបរមាស្តីពីកិច្ចការពារសិទ្ធិជនរងគ្រោះដោយអំពើជួញដូរមនុស្ស និងដំណើរការគ្រប់គ្រងករណី ដល់អាជ្ញាធរ អ្នកផ្តល់សេវាមូលដ្ឋាន ដើម្បីផ្តល់សេវាសមស្របដល់ជនរងគ្រោះដោយអំពើជួញដូរមនុស្ស ដោយមានការអញ្ជើញចូលរួមពីសំណាក់ អគ្គនាយករង ប្រធាន អនុប្រធាននាយកដ្ឋានគាំពារជនរងគ្រោះ តំណាងប្រធានមន្ទីរសង្គមកិច្ច ខេត្តបាត់ដំបង អភិបាលរងស្រុកកំរៀង មន្ត្រីការិយាល័យសង្គមកិច្ច និងសុខមាលភាពសង្គមស្រុក មេឃុំ ជំទប់ឃុំ ក្រុមប្រឹក្សាឃុំទទួលបន្ទុកស្ត្រី និងកុមារ មណ្ឌលសុខភាពឃុំ នាយកវិទ្យាល័យ អនុវិទ្យាល័យ ប្រធានភូមិ ប៉ូលីសប៉ុស្តិ៍ សរុបចំនួន ៤៦នាក់។
វគ្គបណ្តុះបណ្តាលនេះមានរយៈពេល ៣ថ្ងៃ ក្នុងគោលបំណងបញ្ជ្រាបការយល់ដឹងពីគោលនយោបាយ និងបទដ្ឋានស្តីពីកិច្ចការពារសិទ្ធិរបស់ជនរងគ្រោះដោយអំពើជួញដូរមនុស្ស និង ដំណើរការគ្រប់គ្រងករណីជនរងគ្រោះដោយអំពើជួញដូរមនុស្ស និងសិទ្ធិរបស់ជនរងគ្រោះ ដល់អ្នកផ្តល់សេវាជួរមុខ យល់ដឹងកាន់តែស៊ីជម្រៅ នូវការគោរពសិទ្ធិជនរងគ្រោះ ការផ្តល់សេវាដោយផ្ដោតលើយេនឌ័រ ពិសេសស្ត្រី និងកុមារ។ កម្មវិធីនេះរៀបចំដោយនាយកដ្ឋានគាំពារជនរងគ្រោះ សហការគាំទ្រពីអង្គការអាស៊ានអូស្ត្រាលីប្រយុទ្ធប្រឆាំងអំពើជួញដូរមនុស្សនៅកម្ពុជា និង A21៕
