ខេត្តសៀមរាប ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នាព្រឹកថ្ងៃពុធ ៤កេីត ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែមីនា ឆ្នាំ២០២៤ ឯកឧត្តម ឌីន បូរី អគ្គនាយកសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជេីញចូលរួមជាអធិបតី ក្នុងសិក្ខាសាលាពិគ្រោះយោបល់ស្តីពី ការពង្រឹងការថែទាំជំនួស និងកិច្ចការពារកុមារនៅកម្ពុជា។

សិក្ខាសាលានេះត្រូវបានសហការរៀបចំឡើងដោយ អង្គការជីវិតនៅកម្ពុជា អង្គការម្លប់ឫស្សី អង្គការហូលថ៍អន្តរជាតិ អង្គការកុមារក្នុងគ្រួសារ អង្គការជំហានដំបូងកម្ពុជា អង្គការម្លប់តាប៉ាង និងមន្ទីរពេទ្យកុមារអង្គរ) នៅសណ្ឋាគារអង្គរប៉ារ៉ាឌី ខេត្តសៀមរាប ដោយមានការចូលរួមពីឯកឧត្តមអភិបាលរងខេត្ត លោកជំទាវប្រធាន គ.ក.ស.ក នៃរដ្ឋបាលខេត្ត លោក លោកស្រីប្រធាននាយកដ្ឋានជំនាញ និងមន្ទីរសង្គមកិច្ច អតីតយុទ្ធជន និងយុវនីតិសម្បទាចំនួន ៦ (ខេត្តសៀមរាប ខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តកំពង់ធំ និងខេត្តព្រះសីហនុ) ព្រមទាំងអង្គការដៃគូអភិវឌ្ឍន៍ សរុបអ្នកចូលរួមចំនួន ៩០នាក់ ស្រី ៣៨នាក់។

សិក្ខាសាលានេះ មានរយ:ពេល ២ថ្ងៃ គឺថ្ងៃទី១៣ និងទី១៤ ខែមីនា ឆ្នាំ២០២៤ រៀបចំឡេីងក្នុងគោលបំណង ចែករំលែកសមិទ្ធផល បញ្ហាប្រឈម និងទិសដៅបន្តរបស់រាជរដ្ឋាភិបាល ជាពិសេសក្រសួងសង្គមកិច្ច អតីតយុទ្ធជន និងយុវនីតិសម្បទា និងការអនុវត្តល្អរបស់អង្គការដៃគូដែលទទួលជំនួយពីមូលនិធិ GHR ពាក់ព័ន្ធនឹងការថែទាំជំនួស និងកិច្ចការពារកុមារនៅកម្ពុជា។