ទីស្ដីការក្រសួង ៖ នាល្ងាចថ្ងៃទី១៥ ខែមីនា ឆ្នាំ២០២៤ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានទទួលជួបសម្ដែងការគួរសមជាមួយលោក Fumio Yamada ប្រធានអង្គការ JCIA និងសហការីដើម្បីពិភាក្សាលើការងារបណ្ដុះបណ្ដាលជនមានពិការភាព ជនក្រីក្រ និងគម្រោងបណ្ដុះបណ្ដាលថែទាំមនុស្សចាស់ នៅទីស្ដីការក្រសួងសង្គមកិច្ច អតីតយុទ្ធជន និងយុវនីតិសម្បទា។
អង្គការ Japan Cambodia Interactive Association (JCIA) ជាអង្គការមនុស្សធម៌ មានទីស្នាក់ការនៅប្រទេសជប៉ុន។ អង្គការនេះបានចុះពិធីសារកិច្ចព្រមព្រៀងជាមួយក្រសួងសង្គមកិច្ច អតីតយុទ្ធជន និងយុវនីតិសម្បទាក្នុងភាពជាដៃគូតាំងពីឆ្នាំ១៩៩៦។ អង្គការ JCIA កំពុងបន្តការគាំទ្រដល់ មជ្ឈមណ្ឌលអភិវឌ្ឍន៍សង្គមពោធិ៍សែនជ័យ លើគម្រោងកម្មវិធីបណ្តុះបណ្តាលវិជ្ជាជីវៈជូនជនមានពិការភាព និងជនក្រីក្រដែលគ្របដណ្តប់ទូទាំងរាជធានី និងខេត្តនៃព្រះរាជាណាចក្រកម្ពុជា។
