ភ្នំពេញ៖ មូលនិធិជាតិជំនួយសង្គមបានបើកវគ្គបណ្តុះបណ្តាលរយៈពេល២ថ្ងៃគឺចាប់ពីថ្ងៃទី១៦-១៧ខែមករាឆ្នាំ២០២៤នៅសណ្ឋាគារភ្នំពេញ ស្តីពីការសរសេរព័ត៌មានខ្លី បទយកការណ៍ និង ជីវប្រវត្តិជោគជ័យ ដើម្បីពង្រឹងសមត្ថភាពដល់សិក្ខាមប្រមាណជា៤៣រូប ដែលជាក្រុមការងារព័ត៌មាន និង ផ្សព្វផ្សាយ នៃក្រសួងសង្គមកិច្ច អតីតយុទ្ធជន និងយុវនីតិសម្បទា មូលនិធិជាតិជំនួយសង្គម ក្រសួងផែនការ អគ្គលេខាធិការដ្ឋានក្រុមប្រឹក្សាជាតិគាំពារសង្គម និង បេឡាជាតិសន្តិសុខសង្គមនៃក្រសួងការងារ និង បណ្តុះបណ្តាលវិជ្ជាជីវៈ។
ក្នុងឱកាសមានមតិបើកវគ្គបណ្តុះបណ្តាលនេះ លោកស្រីប្រាក់ ថាវៈភារី អគ្គនាយករង នៃមូលនិធិជាតិជំនួយសង្គមបានលើកឡើងថា វគ្គបណ្តុះបណ្តាលនេះត្រូវបានរៀបចំឡើងក្នុងគោលបំណងផ្តល់ចំណេះដឹងបន្ថែមទៀត ដល់សិក្ខាកាម ដែលមកពីស្ថាប័នពាក់ព័ន្ធ ឱ្យមានសមត្ថភាព ក្នុងការប្រមូលព័ត៌មាន សរសេរព័ត៌មានខ្លី បទយកការណ៍ និង ប្រវត្តិជោគជ័យរបស់អ្នកទទួលផល ឬកម្មវិធី ដើម្បីយកទៅប្រើប្រាស់ក្នុងការអនុវត្តការងារប្រចាំថ្ងៃឱ្យទទួលបានលទ្ធផលកាន់តែល្អប្រសើរបន្ថែមទៀត។ ឆ្លៀតក្នុងឱកាសនោះ លោកស្រីក៏បានថ្លែងអំណរអរគុណដល់ភ្នាក់ងារអាល្លឺម៉ង់សម្រាប់ការអភិវឌ្ឍអន្តរជាតិ(GIZ) ដែលជាដៃគូរសហការតាមរយៈគម្រោងលើកកម្ពស់គាំពារសង្គមនិងសុខភាព ដែលតែងតែជួយដល់ការអភិវឌ្ឍន៍ សមត្ថភាពធនធានមនុស្សនិងស្ថាប័ន ។
