ក្រចេះ÷ នៅព្រឹកថ្ងៃសុក្រ ទី១៧ ខែវិច្ឆិកា ឆ្នាំ២០២៣ លោកជំទាវ ខៀវ បូរី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជើញជាគណៈអធិបតីក្នុងពិធីប្រារព្ធទិវាកុមារពិភពលោកឆ្នាំ២០២៣ ក្រោមអធិបតីភាព លោកជំទាវបណ្ឌិត ងិន លីណា រដ្ឋលេខាធិការក្រសួងបរិស្ថាន ដែលរៀបចំដោយក្រុមយុវជនភ្លើងគប់ សហការជាមួយអង្គការយូនីសេហ្វប្រចាំកម្ពុជា។
ទិវានេះរៀបចំឡើងក្នុងគោលបំណងអបអរសាទរចំពោះសក្តានុពលនិងកិច្ចខិតខំប្រឹងប្រែងដើម្បីភាពជោគជ័យរបស់កុមារនិងយុវជននៅកម្ពុជា អមដំណើរដោយលោកជំទាវ ប៊ូ សោភ័ណ អនុរដ្ឋលេខាធិការ ដោយមានការចូលរួមមកពីតំណាងក្រសួង ស្ថាប័ន ពាក់ព័ន្ធ ភ្នាក់ងារសហប្រជាជាតិ និងអង្គការមិនមែនរដ្ឋាភិបាល យុវជន និងកុមារ សរុបប្រមាណ ៣០០នាក់ នៅសាលមហោស្រព ខេត្តក្រចេះ។
ពិធីប្រព្រឹត្តិទៅមានរយៈពេល ៣ថ្ងៃចាប់ពីថ្ងៃទី១៧-១៩ ខែវិច្ឆិកា ឆ្នាំ២០២៣ ដោយមានរៀបចំកម្មវិធីជាច្រើនដូចជា កម្មវិធីចុះហត្ថលេខានៅលើអនុស្សារណៈយោគយល់គ្នារវាងក្រសួងបរិស្ថាន រដ្ឋបាលខេត្តក្រចេះ ស្ទឹងត្រែង រតនគិរី និងខេត្តមណ្ឌលគិរី ស្តីពីយុទ្ធនាការកាត់បន្ថយការប្រើប្រាស់ប្លាស្ទិក “ខ្ញុំមិនប្រើប្រាស់ថង់ប្លាស្ទិកទេ” ការប្រកួតប្រជែងសមត្ថភាព យុវជនលើ របាំប្រពៃណី ការបង្ហាញព៌ត័មានពីសត្វផ្សោត ការដាំដើមឈើ បុណ្យភូមិ ល្បែងប្រជាប្រិយ។ល។
