ថ្ងៃព្រហស្បតិ៍ ១កើត ខែចេត្រ ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី ១៩ ខែមីនា ឆ្នាំ២០២៦ ឯកឧត្តម ជា សុមេធី រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន បានអញ្ជើញចូលរួមពិធីអបអរសាទរទិវាជាតិសង្គមកិច្ចលើកទី២និងទិវាសង្គមកិច្ចពិភពលោកលើកទី១៩ ឆ្នាំ២០២៦ ក្រោមប្រធានបទ “រួមគ្នាកសាងក្តីសង្ឃឹមនិងភាពសុខដុមរមនា” និងមានការអញ្ជើញចូលរួមពីឯកឧត្តម លោកជំទាវ តំណាងក្រសួង ស្ថាប័ន តំណាងរដ្ឋបាលរាជធានី ខេត្ត ជនជាតិភាគតិច ជនជាតិឥស្លាម ជនពិការ កុមារកំព្រា សាស្ត្រាចារ្យ និសិ្សត តំណាងអង្គការដៃគូ និងអ្នកពាក់ព័ន្ធសរុបប្រមាណ២៨០នាក់។ ទិវានេះរៀបចំឡើងក្នុងគោលបំណងបង្កើនគុណតម្លៃ និងលើកកម្ពស់ការយល់ដឹងជាសាធារណៈអំពីការងារសង្គមកិច្ច និងការអភិវឌ្ឍកម្លាំងសេវាសង្គម សំដៅឱ្យការផ្តល់សេវាសង្គមកិច្ចនៅកម្ពុជា កាន់តែមានប្រសិទ្ធភាព ស័ក្តិសិទ្ធិភាព និងបរិយាបន្ន ស្របតាមបរិបទនៃការរីកចំរើនគ្រប់វិស័យដែលជាផលនៃសន្តិភាព។
