ស្ទឹងត្រែង៖ រដ្ឋបាលស្រុកថាឡាបរីវ៉ាត់ នាថ្ងៃទី១៩ ខែមករា ឆ្នាំ២០២៤នេះ មន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តស្ទឹងត្រែង បានសហការជាមួយរដ្ឋបាលខេត្ត រដ្ឋបាលស្រុកថាឡាបរិវ៉ាត់ រៀបចំពីធីបើកផ្ដល់ប្រាក់របបគោលនយោបាយជូនជនពិការក្រីក្រនៅតាមសហគមន៍ សរុបចំនួន ២១៥នាក់ ស្ថិតក្រោមអធិបតីភាព ឯកឧត្តម ចៅ មុន្នីរ៉ា អភិបាលរងនៃគណ:អភិបាលខេត្ត តំណាងដ៏ខ្ពង់ខ្ពស់ ឯកឧត្តម ស្វាយ សំអ៊ាង អភិបាលនៃគណ:អភិបាលខេត្តស្ទឹងត្រែង និង មានការអញ្ជើញចូលរួមពីមន្ទីរពាក់ព័ន្ធ ដូចជា មន្ទីរផែនការ .មន្ទីរសុខាភិបាល .មន្ទីរកិច្ចការនារី .មន្ទីរសេដ្ឋកិច្ចនិងហិរញ្ញវត្ថុ .មន្ទីរការងារបណ្ដុះបណ្ដាលវិជ្ជាជីវ: រដ្ឋបាលស្រុក រដ្ឋបាលឃុំ មូលដ្ឋានសុខាភិបាល មន្ត្រីនៃមន្ទីរសង្គមកិច្ច អតីតយុទ្ធជន និងយុវនីតិសម្បទា សរុបប្រមាណ ២៦៣នាក់។
រាជរដ្ឋាភិបាលតែងយកចិត្តទុកដាក់ខ្ពស់ចំពោះសុខទុក្ខបងប្អូនប្រជាពលរដ្ឋក្រីក្រជួបការលំបាកនៅតាមសហគមន៍ ពិសេសជនមានពិការភាព ដោយមិនបោះបង់នណាម្នាក់ចោលឡើយ។ ជាក់ស្តែងក្រៅពីការបើកផ្តល់ប្រាក់របបគោលនយោបាយខាងលើ មូលនិធិជាតិជំនួយសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទាសហការជាមួយអគ្គលេខាធិការដ្ឋានក្រុមប្រឹក្សាជាតិគាំពារសង្គម បាននឹងកំពុងរៀបចំឯកសារគោលប្រតិបត្តិកម្មវិធីជាតិជំនួយសង្គមក្នុងកញ្ចប់គ្រួសារ ដែលជនមានពិការភាពមកពីគ្រួសារមានប័ណ្ណសមធម៌គឺជាក្រុមទទួលផលក្នុងចំណោមក្រុមគោលដៅរបស់កម្មវិធី។ ក្រសួងបាននឹងកំពុងកំណត់អត្តសញ្ញាណជនមានពិការភាព និងផ្តល់ប័ណ្ណសម្គាល់ពិការភាពប្រមាណជាង៣០ម៉ឺនប័ណ្ណ បានជ្រើសរើសជនពិការឱ្យចូលបម្រើការងារក្នុងស្ថាប័នរដ្ឋ ប្រមាណ៣៧៤៨នាក់ (ស្រី៨៦២នាក់) និងបម្រើការងារនៅតាមសហគ្រាសវិស័យឯកជន ប្រមាណ៣,៧៥៩នាក់។ ក្រៅពីនេះ មូលនិធិជនពិការតាមរយៈមណ្ឌលស្តារលទ្ធភាពពលកម្មកាយសម្បទាទាំង១១ ក៏បាននឹងកំពុងបម្រើសេវាផ្តល់សម្ភារៈ ឧបករណ៍អវយវៈសិប្បនិម្មិត និងរណប និងសាងសង់ផ្ទះដល់បងប្អូនដែលមានជីវភាពខ្វះខាត់ជួបការលំបាកខ្លាំងផងដែរ។
