ភ្នំពេញ៖ នារសៀលថ្ងៃទី២០ ខែមករា ឆ្នាំ២០២៤នេះ ឯកឧត្តម ប្រាក់ សុខយូរ រដ្ឋលេខាធិការប្រចាំការ និង លោកជំទាវ ស៊ាង លាភី ជំនួសមុខអោយក្រុមគ្រួសារឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និង លោកជំទាវ ជា ផល្គុន បាននាំបុត្រាបុត្រី សាច់ញាតិ និងសម្បុរសជនយកអំណោយសម្បុរសធម៌ជូនដល់មជ្ឈមណ្ឌលទារក និងកុមារជាតិ មានអង្ករ១០បាវ មី៦កេះ ទឹកដោះគោ ទឹកស៊ីអ៊ីវ សាប៊ូ ប្រេងក្រឡា និងសម្ភារៈជាច្រើនមុខទៀត ព្រមទាំង ថវិកាឧបត្ថម្ភ មជ្ឈមណ្ឌលចំនួន ១២លានរៀល និងឧបត្ថម្ភបុគ្គលិកបម្រើការងារក្នុងមណ្ឌលចំនួន ៨៣នាក់ ក្នុងម្នាក់ទទួលបានថវិកា១០ម៉ឺនរៀល ដែលសរុបជាទឹកប្រាក់ទាំងអស់ចំនួន២៦,៩០០,០០០រៀល។
នៅក្នុងឱកាសសំណេះសំណាល កញ្ញា ប្រាក់ សោមម៉ារីណា ហៅ ណាណា បានមានមតិសម្តែងនូវសេចក្តីរំភើបរីករាយ ដោយបានផ្តល់នូវសេចក្តីស្រឡាញ់ និង ស្នាមញញឹមដល់កុមារក្នុងមណ្ឌលទាំងអស់ តាមរយៈការចែករំលែកនូវធនធាន ជាសម្ភារៈគ្រឿងបរិភោគ និង ថវិកាសប្បុរធម៌ដែលបានមកពីការចូលរួមបរិច្ចាគពីបងប្អូនសាច់ញាតិ មិត្តភ័ក្រ្ត និងសប្បុរសជន នាឱកាសថ្ងៃខួបកំណើតរបស់កញ្ញា ខួបកំណើតបុត្រារបស់ឯកឧត្តមរដ្ឋមន្ត្រី ខួបកំណេីតប្អូន និង មិត្តភ័ក្តដ៏ទៃទៀត ។
មជ្ឈមណ្ឌលទារក និងកុមារជាតិ ត្រូវបានបង្កើតតាំងពីឆ្នាំ១៩៨០ បច្ចុប្បន្នមានកុមារពិការសរុប១៥៦នាក់(ស្រី៦៨នាក់) កុមារមានផ្ទុកមេរោគអេដស៍ចំនួន០៧នាក់ និងកុមារធម្មតា០៦នាក់ និងមានបុគ្គលិកបម្រើការងារចំនួន៨៣នាក់។
