សៀមរាប÷ ថ្ងៃពុធ ទី២០ ខែតុលា ឆ្នាំ២០២៣ ក្រុមប្រឹក្សាសកម្មភាពជនពិការខេត្តសៀមរាប សហការជាមួយអគ្គលេខាធិការដ្ឋានក្រុមប្រឹក្សាសកម្មភាពជនពិការ រៀបចំវគ្គបណ្តុះបណ្តាលស្តីពី “បទដ្ឋានបច្ចេកទេសហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព” និងផ្សព្វផ្សាយលិខិតបទដ្ឋានគតិយុត្តនានាពាក់ព័ន្ធនិងវិស័យពិការភាពនៅក្នុងព្រះរាជាណាចក្រកម្ពុជា ជូនថ្នាក់ដឹកនាំ និងមន្ត្រីរាជការនៃមន្ទីរសុខាភិបាលខេត្តសៀមរាប ដែលមានអ្នកចូលរួម សរុបចំនួន ៤៥នាក់ នៅសាលប្រជុំមន្ទីរសុខាភិបាលខេត្តសៀមរាប។
វគ្គបណ្ដុះបណ្ដាលនេះមានគោលបំណងដើម្បីផ្សព្វផ្សាយអំពីលិខិតបទដ្ឋានគតិយុត្តនានា ដល់មន្ត្រីថ្នាក់ក្រុង-ស្រុក ទាំង១២ ឃុំ-សង្កាត់ និងមន្ត្រីនៅតាមមន្ទីរ-អង្គភាពជុំវិញខេត្តសៀមរាប។
ឯកឧត្តមវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានវាយតម្លៃខ្ពស់និងសូមកោតសរសើរចំពោះការរៀបចំវគ្គបណ្តុះបណ្តាលនេះ ដោយលោកស្នើឱ្យអគ្គលេខាធិការដ្ឋានក្រុមប្រឹក្សាសកម្មភាពជនពិការ ក្រុមប្រឹក្សាសកម្មភាពជនពិការខេត្ត បន្តរៀបចំវគ្គបណ្តុះបណ្តាលដ៏មានសារៈសំខាន់នេះដល់មន្រ្តីនៅតាមមណ្ឌលសុខភាពទាំង៩៣ និងមន្ទីរពេទ្យបង្អែកផងដែរ៕
