ទីស្ដីការក្រសួង ៖ នារសៀលថ្ងៃទី២១ ខែឧសភា ឆ្នាំ២០២៤ ឯកឧត្តម ប្រាក់ សុខយូរ រដ្ឋលេខាធិការប្រចាំការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញដឹកនាំកិច្ចប្រជុំក្រុមការងារអនុវត្តបទបញ្ជាលេខ ០១ បប ស្ដីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់ប្រចាំក្រសួងសង្គមកិច្ច អតីតយុទ្ធជន និងយុវនីតិសម្បទា ។
កិច្ចប្រជុំបានប្រព្រឹត្តទៅតាមរបៀបវារៈដូចខាងក្រោម៖
១. ផ្សព្វផ្សាយសមាសភាពក្រុមការងារអនុវត្តបទបញ្ជាលេខ ០១ បប ប្រចាំក្រសួង ស.អ.យ។
២. ពិនិត្យ និងពិភាក្សាលើការរៀបចំផែនការសកម្មភាពសម្រាប់ការធ្វើតេស្ដរហ័សរកសារធាតុញៀនជូនថ្នាក់ដឹកនាំ និងមន្រ្តីរាជការទាំងអស់របស់ក្រសួង។
សូមជម្រាបថា រាជរដ្ឋាភិបាលបានចេញបទបញ្ជាលេខ ០១ បប ចុះថ្ងៃទី២០ ខែកុម្ភៈ ឆ្នាំ២០២៤ ស្តីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាល ថ្នាក់ក្រោមជាតិរបស់រាជរដ្ឋាភិបាលកម្ពុជា។
ក្នុងបទបញ្ជាបានណែនាំដល់ក្រសួង ស្ថាប័ន ត្រូវបង្កើនការត្រួតពិនិត្យជាប្រចាំលើមន្ត្រីរាជការ និងមន្ត្រីកិច្ចសន្យា ចំពោះការប្រើប្រាស់គ្រឿងញៀន និងពាក់ព័ន្ធនឹងគ្រឿងញៀនខុសច្បាប់។ មន្ត្រីរាជការដែលប្រើប្រាស់ និងពាក់ព័ន្ធនឹងគ្រឿងញៀន ត្រូវបញ្ចប់ពីមុខតំណែង និងបណ្តេញចេញពីក្របខណ្ឌដោយគ្មានការលើកលែង។
