ទីក្រុងសេអ៊ូល៖ ថ្ងៃអង្គារ ៣រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤ ឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច និងជានាយកខុទ្ទកាល័យរដ្ឋមន្ត្រី នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានដឹកនាំក្រុមការងាររបស់ក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជើញចូលរួម និងជាវាគ្មិនក្នុងសិក្ខាសាលាអប់រំស្តីពីឌីជីថលនីយកម្មក្នុងយុទ្ធសាស្ត្រគាំពារសង្គមក្រោយវិបត្តិកូវីដ-១៩ នៅប្រទេសកូរ៉េ និងកម្ពុជា ដែលប្រព្រឹត្តទៅនៅសាកលវិទ្យាល័យជាតិសេអ៊ូល (SNU) នៃសាធារណ:រដ្ឋកូរ៉េ។
សិក្ខាសាលាអប់រំនេះត្រូវបានរៀបចំឡើងក្នុងគោលបំណងជំរុញការយល់ដឹងស៊ីជំរៅពីយន្តការគាំពារសង្គម ចែករំលែកអំពីឧត្តមានុវត្ត និងស្វែងរកនូវអភិក្រមនវានុវត្តន៍នានា ដើម្បីបង្កើនភាពធន់ (resilience) និងបរិយាបន្ន (Inclusiveness) ក្នុងប្រព័ន្ធគាំពារសង្គម ជាពិសេសគំនិតផ្តួចផ្តើមថ្មីៗរបស់កម្ពុជាក្នុងឌីជីថលនីយកម្ម។
