ភ្នំពេញ៖ មូលនិធិជាតិជំនួយសង្គម (ម.ជ.ជ.) នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានទទួលពានរង្វាន់ឧត្តមានុវត្តន៍ ស្តីពីកិច្ចគាំពារសង្គម សម្រាប់គ្រប់ដំណាក់កាលនៃជីវិត នៅទីក្រុងកូឡាឡាំពួ ប្រទេសម៉ាឡេស៊ីនាថ្ងៃទី ២១ ខែវិច្ឆិកា ឆ្នាំ២០២៣។
ឯកឧត្តម ស៊ីម សុធន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកមូលនិធិជាតិជំនួយសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញទទួលពានរង្វាន់ឧត្តមានុវត្តន៍ដោយផ្ទាល់ពីប្រធានផ្លាស់វេននៃសមាគមសន្តិសុខសង្គមអាស៊ាន (ASSA) ឆ្នាំ២០២២ – ២០២៣។
ជាមួយគ្នានេះ ឯកឧត្តម ស៊ីម សុធន បានដឹកនាំគណ:ប្រតិភូនៃមូលនិធិជាតិជំនួយសង្គមចូលរួមសិក្ខាសាលាថ្នាក់អន្តរជាតិ ក្រោមមូលបទ «ការទទួលយកភាពចម្រុះ ដើម្បីកសាងអនាគតរួមគ្នា» នៅប្រទេសម៉ាឡេស៊ី កាលពីថ្ងៃទី២០ ខែវិច្ឆិកា ឆ្នាំ២០២៣។ នៅក្នុងឱកាសនោះដែរ ក៏មានការចុះអនុស្សារណៈនៃការយោគយល់គ្នា (MOU) រវាងសមាគមសន្តិសុខសង្គមអាស៊ាន (ASSA) និងសមាគមសន្តិសុខសង្គមអន្តរជាតិ (ISSA) ក្នុងគោលបំណងបង្កើតនូវកិច្ចសម្របសម្រួលរួមគ្នាក្នុងការលើកកម្ពស់ និងពង្រឹងកិច្ចសហប្រតិបត្តិការរវាងភាគីទាំងពីរ និងកំណត់នូវវិស័យជាអាទិភាព និងភាពជាគំរូរសម្រាប់កិច្ចសហប្រតិបត្តិការ។
ទន្ទឹមនឹងនោះ ឯកឧត្តម និងគណ:ប្រតិភូបានបន្តចូលរួមក្នុងកិច្ចប្រជុំប្រឹក្សាភិបាលនៃសមាគមសន្តិសុខសង្គមអាស៊ាន (ASSA) លើកទី៤០ និងចូលរួមអបអរសាទរក្នុងឱកាសប្រារព្វខួបលើកទី២៥ នៃការបង្កើតសមាគមសន្តិសុខសង្គមអាស៊ាន នាថ្ងៃទី២១ ខែវិច្ឆិកា ឆ្នាំ២០២៣ ដែលបានប្រព្រឹត្តទៅនៅសណ្ឋាគារ Hilton Kuala Lumpur ទីក្រុងកូឡាឡាំពួ ប្រទេសម៉ាឡេស៊ី ដោយមានការចូលរួមពីតំណាងស្ថាប័នសន្តិសុខសង្គមនៃសមាគមសន្តិសុខសង្គមអាស៊ាន (ASSA) ចំនួន ២០ស្ថាប័ន មកពីបណ្តាប្រទេសអាស៊ានទាំង ១០។
ក្នុងកិច្ចប្រជុំប្រឹក្សាភិបាលនៃសមាគមសន្តិសុខសង្គមអាស៊ាន (ASSA) លើកទី៤០ នេះ សមាជិកទាំងអស់បានពិនិត្យ និងពិភាក្សាអំពីវឌ្ឍនភាពនៃផែនការសកម្មភាពឆ្នាំ២០២២-២០២៣ របស់សមាគមសន្តិសុខសង្គមអាស៊ាន (ASSA) និងផែនសកម្មភាពការងារបន្តសម្រាប់ឆ្នាំ២០២៣-២០២៤ របស់ខ្លួនផងដែរ៕
