ទីស្ដីការក្រសួង ៖ នាព្រឹកថ្ងៃទី២៤ ខែឧសភា ឆ្នាំ ២០២៤ អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ សហការជាមួយអង្គការសម្ព័ន្ធសិទ្ធិកុមារកម្ពុជា (CRC Cambodia) និងចលនាកុមារ និងយុវជនកម្ពុជាដើម្បីសិទ្ធិកុមារ (CYMCR) បានរៀបចំវេទិកាកុមារ និងអ្នកធ្វើគោលនយោបាយ ដែលកម្មវិធីនេះរៀបចំឡើងក្នុងគោលបំណងឱ្យកុមារទទួលបាននូវសិទ្ធិចូលរួមរបស់ពួកគេក្នុងការបង្ហាញនូវឆន្ទៈ និងក្តីកង្វល់ អំពីការទទួលបាននូវសិទ្ធិនានា និងលើកឡើងជាមួយអ្នករៀបចំគោលនយោបាយរបស់អ្នកពាក់ព័ន្ធសំខាន់ៗនៃរាជរដ្ឋាភិបាលកម្ពុជា។

កម្មវិធីនេះត្រូវបានដំណើរការដោយក្រុមបណ្តាញចលនាកុមារ និងយុវជនកម្ពុជាដើម្បីសិទ្ធិកុមារ (CYMCR) និងបានអញ្ជើញវាគ្មិនសំខាន់ៗពីបណ្តាក្រសួង ស្ថាប័ន ពាក់ព័ន្ធមកបង្ហាញពីគោលនយោបាយ​របស់ខ្លួនពាក់ព័ន្ធនឹងការអនុវត្តសិទ្ធិកុមារនៅកម្ពុជាជាពិសេសនៅក្នុងយុគ្គសម័យឌីជីថល។

ក្រោយពីទទួលបាននូវការបង្ហាញ និងឆ្លើយបំភ្លឺពីវាគ្មិនទាក់ទងនឹងសំណួរ និងក្តីកង្វល់របស់កុមាររួចមកក្រុមកុមារ និងយុវជនទាំងនោះ នឹងរៀបចំជាសេចក្តីថ្លែងការណ៍របស់ខ្លួន ដើម្បីលើកឡើងដាក់ជូនរាជរដ្ឋាភិបាលសម្រាប់ពិចារណា និងសម្រេចចិត្តនៅក្នុងមីទ្ទីង ខួបអនុស្សាវរីយ៍លើកទី៧៥ ទិវាកុមារអន្តរជាតិ ១មិថុនា ខួបទី២៣ ទិវាប្រឆាំងពលកម្មកុមារ ១២ មិថុនា និងទិវាកុមារកម្ពុជាឆ្នាំ២០២៤ខាងមុខនេះ។​