ភ្នំពេញ៖ថ្ងៃព្រហស្បតិ៍ ទី២៦ ខែតុលា ឆ្នាំ២០២៣ ឯឯកឧត្តម សុខ ផេង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីការតម្រង់ទិសដំបូងជូនមន្ត្រីរាជការ ក្របខណ្ឌថ្មី ឆ្នាំ២០២៣។
វគ្គបណ្តុះបណ្តាលនេះរៀបចំឡើងក្នុងគោលបំណងពង្រឹសមត្ថភាព និងបង្កើនចំណេះដឹង ដល់មន្ត្រីរាជការក្របខណ្ឌថ្មី លើច្បាប់សហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា និងក្រមសីលធម៌វិជ្ជាជីវៈសម្រាប់មន្ត្រីរាជការស៊ីវិល ក៏ដូចជាឲ្យមន្ត្រីរាជការរបស់ក្រសួងឱ្យមានការយល់ដឹងអំពីបេសកកម្ម មុខងារ ភារកិច្ច និងរចនាសម្ព័ន្ធរបស់ក្រសួងដែលជាទុនសម្រាប់បង្ហាញផ្លូវដល់មន្ត្រីរាជការរបស់ក្រសួងក្នុងអនុវត្តមុខងាររបស់ខ្លួនប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ក្នុងការផ្តល់សេវាគាំពារដល់មុខសញ្ញាវិស័យសង្គមកិច្ច ។
ឯកឧត្តម សុខ ផេង រដ្ឋលេខាធិការ បានមានប្រសាសន៍ថា តាមការអនុវត្តយុទ្ធសាស្រ្តបញ្ចកោណ តំណាក់កាលទី១ នៃរាជរដ្ឋាភិបាលកម្ពុជា នីតិកាលទី៧ នៃរដ្ឋសភាក្រោមការដឹកនាំដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងអនុវត្តតាមផែនការយុទ្ធសាស្ត្ររបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រោមការដឹកនាំដោយឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានចាត់ទុកការអភិវឌ្ឍនិងពង្រឹងសមត្ថភាពមន្រ្តីរាជការជាកម្មវិធីអាទិភាព ពីព្រោះការអភិវឌ្ឍមួយប្រកបដោយចីរភាពគឺទាមទាឲ្យមានធនធានមនុស្សដែលពោពេញដោយសមត្ថភាព ចំណេះដឹង ជំនាញ់ច្បាស់លាស់ និងពិតប្រាកដ៕
