ទីស្តីការក្រសួង៖ ថ្ងៃសុក្រ ៥ រោច ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៩ ខែមីនា ឆ្នាំ២០២៤ លោកជំទាវ លៀង ស្រីម៉ុល រដ្ឋលេខាធិការ តំណាង ឯកឧត្តមរដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជើញចូលរួមជាអធិបតីភាព ក្នុងពិធីបើកសិក្ខាសាលា ស្តីពីការជំរុញការអនុវត្តច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ ដល់ក្រសួង ស្ថាប័នរដ្ឋ ក្នុងការជ្រើសរើសមន្រ្តីរាជការជាជនមានពិការភាពចូលបម្រើការងារ មានការចូលរួមពី ឯកឧត្តម អគ្គនាយកដ្ឋានស្តារសម្បទា ឯកឧត្តម លោកជំទាវ លោក លោកស្រី តំណាងក្រសួង ស្ថាប័នរដ្ឋ លោកស្រីអគ្គនាយករង ប្រធាននាយកដ្ឋាន រៀបចំដោយ រដ្ឋបាលសិទ្ធិជនពិការ នៃនាយកដ្ឋានសុខុមាលភាពជនពិការ ក្រសួងស.អ.យ។
លោកជំទាវ គណៈអធិបតី បានលើកឡើងថា សិក្ខាសាលានេះ ជាឱកាសដ៏ល្អមួយក្នុងការជំរុញការអនុវត្តច្បាប់ស្តីពីកិច្ចការពារ និងលើកកម្ពស់សិទ្ធិជនពិការ និងអនុក្រឹត្យលេខ ១០៨ អនក្រ.បក ស្តីពីការកំណត់អត្រា និងបែបបទនៃការជ្រើសរើសជនពិការចូលបម្រើការងារ និងលិខិតបទដ្ឋានគតិយុត្តិពាក់ព័ន្ធនានា ឱ្យកាន់តែមានប្រសិទ្ធភាព។ ការជំរុញច្បាប់ខាងលើ បានផ្តល់ឱកាសការងារដល់ជនមានពិការភាពចូលបម្រើការងារនៅតាមគ្រឹះស្ថានឯកជន និងចូលបម្រើការងារជាក្របខណ្ឌមន្រ្តីរាជការ និងមន្ត្រីកិច្ចសន្យា នៅតាមក្រសួង ស្ថាប័នរដ្ឋ ដែលនេះជាការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងនាមរដ្ឋភាគីនៃអនុសញ្ញាស្តីពីសិទ្ធិជនពិការ។
