រតនគិរី៖ ឯកឧត្តម ឌីន បូរី អគ្គនាយកសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងដ៏ខ្ពង់ខ្ពស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីបើកវគ្គបណ្តុះបណ្តាលលើគោលនយោបាយ និងបទដ្ឋានអប្បបរមា ស្តីពីកិច្ចការពារសិទ្ធិជនរងគ្រោះដោយអំពើជួញដូរមនុស្ស និងដំណើរការគ្រប់គ្រងករណីដល់អាជ្ញាធរ អ្នកផ្តល់សេវាមូលដ្ឋាន ដើម្បីផ្តល់សេវាសមស្របដល់ជនរងគ្រោះដោយអំពើជួញដូរមនុស្ស នៅស្រុកអូរយ៉ាដាវ ខេត្តរតនគិរី ចាប់ពីថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា ឆ្នាំ២០២៣។
វគ្គបណ្តុះបណ្តាលនេះ រៀបចំដោយនាយកដ្ឋានគាំពារជនរងគ្រោះ នៃអគ្គនាយកដ្ឋានសេវាសង្គមកិច្ច ក្រសួងសង្គមកិច្ច អតីតយុទ្ធជន និងយុវនីតិសម្បទា សហការគាំទ្រដោយអង្គការអាស៊ានអូស្ត្រាលីប្រយុទ្ធប្រឆាំងអំពើជួញដូរមនុស្សនៅកម្ពុជា អង្គការការីតាសកម្ពុជា និងអង្គការម៉ារ៉ាស៊ីកម្ពុជា ដោយមានការអញ្ជើញចូលរួមពី លោកស្រី អគ្គនាយករង ប្រធាន អនុប្រធាននាយកដ្ឋានគាំពារជនរងគ្រោះ តំណាងមន្ទីរសង្គមកិច្ចខេត្តរតនគីរី តំណាងអភិបាលស្រុក អូរយ៉ាដាវ ប្រធាការិ.សង្គមកិច្ច និងសុខមាលភាពសង្គមស្រុក មេឃុំ/ជំទប់ ក្រុមប្រឹក្សាឃុំទទួលបន្ទុកស្ត្រី និងកុមារ មណ្ឌលសុខភាពឃុំ នាយកវិទ្យាល័យ អនុវិទ្យាល័យ ប្រធានភូមិ ប៉ូលីសប៉ុស្តិ៍ សរុបចំនួន ៤៧នាក់ ។
វគ្គបណ្តុះបណ្តាលនេះរយៈពេល ៣ថ្ងៃ ក្នុងគោលបំណងបញ្ជ្រាបការយល់ដឹងពីគោលនយោបាយ និងបទដ្ឋានស្តីពីកិច្ចការពារសិទ្ធិរបស់ជនរងគ្រោះដោយអំពើជួញដូរមនុស្ស និងដំណើរការគ្រប់គ្រងករណីជនរងគ្រោះដោយអំពើជួញដូរមនុស្ស និងសិទ្ធរបស់ជនរងគ្រោះ ដល់អ្នកផ្តល់សេវាជួរមុខ យល់ដឹងកាន់តែស៊ីជម្រៅ នូវការគោរពសិទ្ធិជនរងគ្រោះ ការផ្តល់សេវាដោយផ្ដោតលើយេឌ័រ ពិសេសស្ត្រី និងកុមារ៕
