ភ្នំពេញ៖ ឯកឧត្តម នួម សុខុន អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា អមដោយលោក ខឹម សំអាត អគ្គនាយករង តំណាងឯកឧត្តម ស៊ីម សុធន ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម បានអញ្ចើញចូលរួមក្នុងពិធីចុះហត្ថលេខាលើអនុស្សរណៈនៃយោគយល់ស្តីពី“ការអនុវត្តផែនការយុទ្ធសាស្ត្រប្រចាំប្រទេសរយៈពេល៥ឆ្នាំ(២០២៤-២០២៨)” រវាងរាជរដ្ឋាភិបាលកម្ពុជា និង អង្គការសហប្រជាជាតិទទួលបន្ទុកស្បៀងអាហារពិភពលោក (UN-World Food Programme) នាពេលព្រឹកថៃ្ងទី៣០ ខែមករា ឆ្នាំ២០២៤ នៅទីស្តីការក្រសួងការបរទេស និងសហប្រតិបត្តិការអន្តរជាតិ។

ការចុះហត្ថលេខាលោកអនុស្សរណៈនៃយោគយល់នេះ ត្រូវបានធ្វើឡើងដោយលោកជំទាវ យ៉ិនទៀង ពុទ្ធិរស្មី តំណាងរាជរដ្ឋាភិបាលកម្ពុជា និង លោកស្រី Claire Conan តំណាងប្រចាំប្រទេសនៃអង្គការសហប្រជាជាតិទទួលបន្ទុកស្បៀងអាហារពិភពលោក និង មានតំណាងក្រសួងដៃគូ មាន ក្រសួងស.អ.យ. ក្រសួងផែនការ ក្រសួងសុខាភិបាល ក្រសួងអប់រំ យុវជន និងកីឡា អគ្គលេខាធិការដ្ឋានក្រុមប្រឹក្សាស្តារ អភិវឌ្ឍកសិកម្ម និងជនបទ(CARD) អគ្គលេខាធិការដ្ឋានក្រុមប្រឹក្សាជាតិគាំពារសង្គម (GS-NSPC) គណៈកម្មាធិការជាតិគ្រប់គ្រងគ្រោះមហន្តរាយ(NCDM) បានចូលរួមផងដែរ។

ក្នុងសុន្ទរកថាខ្លីរបស់លោកស្រី Claire Conan ដែលគួរកត់សម្គាល់គឺលោកស្រីបានលើកឡើងអំពីកិច្ចសហការក្នុងភាពជាដៃគូជាមួយក្រសួងស.អ.យ. និង មូលនិធិជាតិជំនួយសង្គម លើការអនុវត្តផែនការយុទ្ធសាស្ត្រប្រចាំប្រទេសរយៈពេល៥ឆ្នាំ ដែលទាក់ទងនឹងការអនុវត្តក្របខ័ណ្ឌកិច្ចគាំពារសង្គមឆ្លើយតបនឹងគ្រោះអាសន្ន ដែលប្រមុខរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត ទើបបានប្រកាសដាក់ឱ្យអនុវត្តជាផ្លូវការកាលពីថ្ងៃទី៥ ខែធ្នូ ឆ្នាំ២០២៣ថ្មីៗកន្លងទៅនេះ នៅសណ្ឋាគារសុខារ៉េស៊ីដង់ភ្នំពេញ។