ទីស្តីការក្រសួង៖ រសៀលនាថ្ងៃទី៣០ ខែមករា ឆ្នាំ២០២៤ ឯកឧត្តម សន សុផល អគ្គនាយក នៃអគ្គនាយកដ្ឋានស្តារសម្បទា ក្រសួងសង្គមកិច្ច អតីតយុទ្ធជន និងយុវនីតិសម្បទាអញ្ជើញដឹកនាំនាយកដ្ឋានគាំពារអ្នកញៀនគ្រឿងញៀន ជួបពិភាក្សាការងារជាមួយក្រុមការងារសិក្សាស្រាវជ្រាវរបស់វិទ្យាស្ថានស្រាវជ្រាវវិទ្យាសាស្រ្តនគរបាលនៃបណ្ឌិត្យសភានគរបាលកម្ពុជាដឹកនាំដោយ ឯកឧត្តម យ៉េន យ៉ាត នាយកវិទ្យាស្ថានស្រាវជ្រាវវិទ្យាសាស្រ្តនគរបាលនៃបណ្ឌិត្យសភានគរបាលកម្ពុជា។
ជំនួបពិភាក្សាផ្តើតសំខាន់ទៅលើការងារស្តារនីតិសម្បទាអ្នកញៀនគ្រឿងញៀននៅកម្ពុជា និងផ្លាស់ប្តូរបទពិសោធន៍ រិះរកដំណោះស្រាយកាត់បន្ថយការប្រើប្រាស់គ្រឿងញៀនក្នុងស្រទាប់យុវវ័យនៅកម្ពុជា ដើម្បីចូលរួមអនុវត្តឱ្យបានសម្រេចជោគជ័យនូវយុទ្ធសាស្រ្តបញ្ចកោណដំណាក់កាលទី១ និងគោលនយោបាយអាទិភាពនានា ក៏ដូចជារួមគ្នាទទួលខុសត្រូវ និងពង្រឹងភាពជាម្ចាស់ការក្នុងការអនុវត្តតួនាទីភារកិច្ចរបស់ខ្លួនសំដៅរួមចំណែកការងារអភិវឌ្ឍមូលដ្ឋាន លើកកម្ពស់ការផ្តល់សេវានៃការស្តារនីតិសម្បទាអ្នកញៀនគ្រឿងញៀន និងឆ្លើយតបទៅនឹងសំណើ សំណូមពរ និងសេចក្តីត្រូវការរបស់ប្រជាពលរដ្ឋនៅតាមមូលដ្ឋាន នីមួយៗប្រកបដោយប្រសិទ្ធភាព តម្លាភាព និងគណនេយ្យភាព។
