ភ្នំពេញ៖ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ញ៉ឹក វណ្ណារ៉ា ដឹកនាំកិច្ចប្រជុំលើកទី១ នៃកិច្ចប្រជុំគណៈកម្មាធិការសម្របសម្រួលរួមរបស់គម្រោងអភិវឌ្ឍន៍សមត្ថភាពសម្រាប់ជួយដល់ជនរងគ្រោះដែលរួចពីការជួញដូរមនុស្ស ដែលមានការចូលរួមពីតំណាងជាន់ខ្ពស់នៃ JICA កម្ពុជា លោក Yanagawa Shinji និង ភាគីពាក់ព័ន្ធជាច្រើនរូបទៀត នាថ្ងៃទី៧ ខែវិច្ឆិកា ឆ្នាំ២០២៣ នៅសណ្ឋាគារភ្នំពេញ។

ឯកឧត្តម ញ៉ឹក វណ្ណារ៉ា បានឱ្យដឹងថា រដ្ឋមន្រ្តីក្រសួងសង្គមកិច្ចតែងតែយកចិត្តទុកដាក់ និងផ្តាំផ្ញើរពាក់ព័ន្ធនឹងការជួញដូរមនុស្សនេះត្រូវយកចិត្តទុកដាក់រាល់ករណី ពិភាក្សារាល់កិច្ចការដែលពាក់ព័ន្ធនឹងការប្រយុទ្ធប្រឆាំងនឹងការជួញដូរ តម្រូវឱ្យស្វែងរកធាតុចូលឱ្យបានច្រើនបំផុតតាមដែលអាចធ្វើបាន ដើម្បីជាគំនិតអាចជួយដល់ជនរងគ្រោះពីការជួញដូរ។

រដ្ឋលេខាធិការក្រសួងសង្គមកិច្ចរូបនេះរំពឹងថាកិច្ចសហការជាមួយ JICA និងតាមរយៈការអនុវត្តដែល JICA ជ្រើសយកខេត្តក្រុមគោលដៅ៣ គឺខេត្តបន្ទាយមានជ័យ ត្បូងឃ្មុំ និងខេត្តសៀមរាបនោះ នឹងមានផលសម្រេចល្អដល់កម្ពុជា ជាពិសេសដល់ជនរងគ្រោះដោយការជួញដូរមនុស្ស។

ក្នុងឱកាសនោះដែរ តំណាងជាន់ខ្ពស់នៃ JICA កម្ពុជា លោក Yanagawa Shinji បានលើកឡើងថា កិច្ចប្រជុំថ្ងៃនេះមានការចូលរួមដោយគ្រប់ភាគីពាក់ព័ន្ធទាំងអស់ដែលប្តេជ្ញាចិត្តក្នុងការដោះស្រាយ និងជះឥទ្ធិពលជាវិជ្ជមានលើប្រធានបទសំខាន់នៃការជួញដូរមនុស្ស។ នេះជាកិច្ចខិតខំប្រឹងប្រែងលើកដំបូងដើម្បីធានាថាគ្រប់ភាគីពាក់ព័ន្ធនឹងពិភាក្សា និងធ្វើការរួមគ្នាសម្រាប់គម្រោងក្នុងវិស័យ និងកម្រិតផ្សេងៗ ដើម្បីសម្រេចបានលទ្ធផលជាអតិបរមាប្រកបដោយប្រសិទ្ធភាព។

គម្រោងនេះមានគោលបំណងលើកកម្ពស់ និងពង្រឹងសមត្ថភាពផ្តល់សេវាសម្រាប់អ្នករស់រានមានជីវិតពីការជួញដូរមនុស្ស ជាពិសេសក្រសួងនិងមន្ទីរសង្គមកិច្ច ជាមួយនឹង វិធីសាស្រ្តផ្តោតលើអ្នករស់រានមានជីវិត (SOT) តាមរយៈការដោះស្រាយឧបសគ្គជាច្រើន ដើម្បីបំពេញតម្រូវការរបស់អ្នករស់រានមានជីវិតពីការជួញដូរ។ JICA ទន្ទឹងរង់ចាំកិច្ចសហប្រតិបត្តិការ និងកិច្ចសហការរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា និងអង្គការពាក់ព័ន្ធទាំងអស់ ដើម្បីធានាថាគម្រោងនេះនឹងសម្រេចបាននូវលទ្ធផលសំខាន់ៗក្នុងការគាំទ្រ SOT។

បន្ទាប់ពីបានជួបប្រជុំពិភាក្សាពិគ្រោះយោបល់គ្នារវាងមន្រ្តីបច្ចេកទេសរបស់ក្រសួង និងភាគី JICA បានទទួលលទ្ធផលជាផ្លែផ្កា ហើយភាគីទាំងពីរបានព្រមព្រៀងលើចំណុចជាច្រើន ដែលអាចជួយដល់ជនរងគ្រោះដោយអំពើជួញដូរ៕