ភ្នំពេញ៖ រសៀលថ្ងៃទី៧ ខែវិច្ឆិកា ឆ្នាំ ២០២៣ លោក ថេង ឆវីរិទ្ធ អគ្គនាយករងនៃអគ្គនាយកដ្ឋានសេវាសង្គមកិច្ច តំណាងក្រុមការងារបច្ចេកទេសទទួលបន្ទុកសិទ្ធិមនុស្សរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមប្រជុំការពាររបាយការណ៍ពិនិត្យឡើងវិញជាសកលតាមកាលកំណត់ UPR ជុំទី៤ ក្នុងនោះមានការអញ្ជើញចូលរួមពីក្រសួងស្ថាប័នពាក់ព័ន្ធ ក្នុងការត្រួតពិនិត្យ លើអនុសាសន៍ ដែលក្រសួង-ស្ថាប័ន បានផ្តល់ឱ្យគណៈកម្មាធិការសិទ្ធិកម្ពុជា ដើម្បីការឆ្លើយតបទៅនឹងគណៈកម្មាធិការសិទ្ធិមនុស្សរបស់អង្គការសហប្រជាជាតិ នៅទីស្តីការគណៈកម្មាធិការសិទ្ធិមនុស្សកម្ពុជា ក្រោមអធិបតីភាព ឯកឧត្តម អ៊ិត រ៉ាឌី អនុប្រធានគណៈកម្មាធិការសិទ្ធិមនុស្សកម្ពុជា។
អនុសាសន៍ ដែលក្រសួងសង្គមកិច្ច អតីតយុទ្ធជន និងយុវនីតិសម្បទា ផ្តល់ឱ្យគណៈកម្មាធិការសិទ្ធិមនុស្សកម្ពុជា រួមមាន៖ អនុសាសន៍ទី (៦) ការប្រយុទ្ធប្រឆាំងការជួញដូរមនុស្ស (៨) អំពើហិង្សាលើស្ត្រីនិងកុមារ (១២) យុត្តិធម៌អនីតិជន (១៣) សិទ្ធិជនមានពិការភាព។ ក្នុងអនុសាសន៍ ទាំង៤ខាងលើ ក្រសួងបានធ្វើការដាក់ចូលនូវផែនការយុទ្ធសាស្រ្ត គោលនយោបាយ ច្បាប់ យន្តការ ធនធានបច្ចេកទេស ថវិកា និងទិសដៅអនុវត្តបន្ត៕
