រាជធានីភ្នំពេញ៖ នៅព្រឹកថ្ងៃព្រហស្បតិ៍ ទី៩ ខែវិច្ឆិកា ឆ្នាំ២០២៣ ឯកឧត្តមរដ្ឋមន្រ្ដី ជា សុមេធី អញ្ជើញដឹកនាំគណៈប្រតិភូក្រសួងចូលរួមក្នុងពិធីអបអរសាទរទិវាបុណ្យឯករាជ្យជាតិខួបលើកទី៧០ នៅវិមានឯករាជ្យ និងនៅមុខព្រះបរមរាជវាំង ក្រោមព្រះរាជធិបតីដ៏ខ្ពង់ខ្ពស់បំផុតនៃព្រះករុណាព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
ថ្លែងក្នុងមីទិ្ទញអបអរសាទរខួប៧០ឆ្នាំនៃការបង្កើតកងយុទ្ធពលខេមរភូមិន្ទ នៅទីលានមុខព្រះបរមរាជវាំង សម្ដេចធិបតី ហ៊ុន ម៉ាណែត បានថ្លែងថា រដ្ឋាភិបាលអាណត្តិទី៧របស់សម្ដេចបានប្ដេជ្ញាចិត្តក្នុងការសម្រេចឱ្យបាននូវការ ការពារសន្ដិភាព ឯករាជ្យអធិបតេយ្យ និងសមិទ្ធផលជាតិឱ្យបានថិតថេរ រួមគ្នាជាមួយនឹងការកសាងប្រទេសជារដ្ឋប្រជាធិបតេយ្យសេរីពហុបក្សដ៏ជឿនលឿន និងរឹងមាំដោយផ្អែកលើច្បាប់ ធ្វើឱ្យជីវភាពរបស់ប្រជាពលរដ្ឋកាន់តែរីកចម្រើន សម្បូរសប្បាយប្រកបដោយភាពថ្លៃថ្នូរ និងការគោរពសិទ្ធិមនុស្ស។
ជាមួយគ្នានេះសម្ដេចក៏បានប្ដេជ្ញាថានឹងកសាងប្រព័ន្ធគាំពារសង្គមដោយលើកកម្ពស់ និងគ្មានការរើសអើងប្រកបដោយប្រសិទ្ធភាព ធានានូវចីរភាពហិរញ្ញវត្ថុដែលធានាដល់ការគាំពារដល់ប្រជាជនក្នុងការឆ្លើយតបចំពោះហានិភ័យសេដ្ឋកិច្ច សុខភាពសាធារណៈ និងភាពងាយរងគ្រោះផ្សេងទៀត រួមទាំងបោសសម្អាតមីនឱ្យអស់នៅឆ្នាំ២០២៥។
នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបង្ហាញពីទំនុកចិត្តក្នុងការលើកស្ទួយមោទនភាពជាតិខ្មែរឱ្យខ្ពស់ដូចសម័យអង្គរ និងបានបញ្ជាក់នៅចំពោះព្រះភ័ក្រព្រះមហាក្សត្រថារាជរដ្ឋាភិបាលរបស់សម្ដេចនឹងធ្វើឱ្យប្រទេសកម្ពុជាកាន់តែរីកចម្រើន រួមទាំងកសាងប្រជាធិបតេយ្យប្រទេសឱ្យកាន់តែជឿនលឿន និងរឹងមាំផងដែរ។
ព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី បានអំពាវនាវដល់ជនរួមជាតិខ្មែរទាំងអស់រួមសាមគ្គីគ្នាដើម្បីកសាងមាតុភូមិកម្ពុជាឱ្យកាន់តែរីកចម្រើនថែមទៀត ស្របតាមគោលនយោបាយរបស់រាជរដ្ឋាភិបាល។
ព្រះមហាក្សត្រទ្រង់ថ្លែងព្រះរាជសារដោយមានព្រះរាជឱង្ការកោតសរសើរការដឹកនាំរបស់នាយករដ្ឋមន្ត្រីថ្មី ដែលបានធ្វើឱ្យមានការប្រែប្រួលជាច្រើន និងបានរក្សានូវការដើរតាមមាគ៌ានយោបាយរបស់អតីតនាយករដ្ឋមន្ត្រី សម្ដេចតេជោ ហ៊ុន សែន បានយ៉ាងល្អដែលធ្វើឱ្យប្រទេសរក្សាបាននូវសុខសន្ដិភាព ឯកភាពជាតិ និងសុខដុមនៅក្នុងសង្គម ជាពិសេសបានធ្វើកិត្យានុភាពជាកាន់តែល្បីរន្ទឺលើឆាកអន្តរជាតិ។ ជាមួយគ្នានេះព្រះមហាក្សត្របានអំពាវនាវឱ្យប្រជាពលរដ្ឋគ្រប់រូបចូលរួមសាមគ្គីគ្នាដើម្បីកសាងជាតិជាបន្តទៀត។
ព្រះអង្គមានព្រះរាជបន្ទូលថា៖ «ខ្ញុំសូមអំពាវនាវបងប្អូនប្រជាពលរដ្ឋកម្ពុជាគ្រប់មជ្ឈដ្ឋានសូមរួបរួមសាមគ្គីជាធ្លុងមួយក្រោមដំបូលរដ្ឋធម្មនុញ្ញដើម្បីចូលរួមចំណែកការពារ និងកសាងមាតុភូមិលើគ្រប់វិស័យ»។
ព្រះមហាក្សត្រ ព្រះអង្គមានជំនឿថាកម្ពុជានៅតែមានសន្ដិភាព ស្ថេរិភាព រស់ក្រោមដំបូលរដ្ឋធម្មនុញ្ញតែមួយនៃមហាសាមគ្គីជាតិ ព្រះពុទ្ធសាសនា និងព្រះមហាក្សត្រ កម្ពុជាពិតជាគ្មានសត្រូវណាមួយអាចរំលោភឈ្លានពានលើទឹកដីកម្ពុជាបាននោះទេ៕
