ខេត្តព្រះសីហនុ៖ ថ្ងៃទី១៥ ខែកុម្ភៈ ឆ្នាំ២០២៤ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម សន សុផល អគ្គនាយក នៃអគ្គនាយកដ្ឋានស្តារសម្បទា ក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីជាមួយ ឯឧត្តម គួច ចំរើន អភិបាលនៃគណៈអភិបាលខេត្តព្រះសីហនុ ក្នុងពិធីបើកផ្តល់របបគោលនយោបាយជូនចំពោះជនមានពិការភាពក្រីក្រនៅតាមសហគមន៍ ក្រុងព្រះសីហនុ ខេត្តព្រះសីហនុ សម្រាប់ឆ្នាំ២០២៣ ដោយមានការចូលរួមពីលោកប្រធាននាយកដ្ឋានសុខុមាលភាពជនពិការ លោកប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រះសីហនុ លោកអភិបាលក្រុងព្រះសីហនុ លោកចៅសង្កាត់ លោកមេភូមិ និងជនមានពិការភាព។
ក្នុងពិធីនេះដែរ ឯកឧត្តមអគ្គនាយក សន សុផល បានពាំនាំប្រសាសន៍សួរសុខទុក្ខ របស់ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទាជូនចំពោះបងប្អូនជនមានពិការភាពដែលបានចូលរួមក្នុងពិធី និងបងប្អូនជនមានពិការភាពទូទាំងប្រទេសផងដែរ។ ជាមួយគ្នានោះ ឯកឧត្តម ក៏បានផ្តាំផ្ញើ ដល់លោកចៅសង្កាត់ លោកអភិបាលក្រុង និងមន្ទីរសង្គមកិច្ច អតីតយុទ្ធជន និងយុវនីតិសម្បទា យកចិត្តទុកដាក់ខ្ពស់ជំរុញការកំណត់អត្តសញ្ញាណកម្មជនពិការសម្រាប់ទទួលបណ្ណសម្គាល់ជនពិការ ដេីម្បីពួកគាត់ទទួលបានអត្ថប្រយោជន៍ជាច្រេីនពីរដ្ឋាភិបាល៕
