រាជធានីភ្នំពេញ ៖ នៅព្រឹកថ្ងៃទី២៩ ខែឧសភា ឆ្នាំ២០២៤ ថ្នាក់ដឹកនាំនៃក្រសួងសង្គមកិច្ច អតីតយុទ្ធជន និងយុវនីតិសម្បទា រួមមាន ឯកឧត្តម សែម សុខា រដ្ឋលេខាធិការ ឯកឧត្តម ចាប តូ ,ឯកឧត្តម ឈឹម វាសនា អនុរដ្ឋលេខាធិការ បានដឹកនាំក្រុមការងារគាំពារជនមានពិការភាព ជួបប្រជុំពិភាក្សាជាមួយក្រុមការងារ រដ្ឋបាលរាជធានីភ្នំពេញ មន្ទីរ ខណ្ឌ អង្គភាពពាក់ព័ន្ធ ដើម្បីរកវិធីសាស្រ្តដោះស្រាយបញ្ហាជនពិការច្រៀងតាមស្តុប នៅក្នុងរាជធានីភ្នំពេញ ដែលមានសមាសភាពចូលរួមពី ឯកឧត្តមអនុរដ្ឋលេខាធិការ ឯកឧត្តមអភិបាលរង ប្រធានមន្ទីរ និងលោក លោកស្រីតាមបណ្តាខណ្ឌទាំង១៤ សរុបប្រមាណ ៤៥នាក់ នៅសាលប្រជុំសាលារាជធានីភ្នំពេញ។
កិច្ចប្រជុំបានប្រព្រឹត្តទៅក្រោមបរិយាកាសស្និទ្ធស្នាល និងសាមគ្គីភាពដោយទទួលបានលទ្ធផលដូចខាងក្រោម៖
១. សាលារាជធានីភ្នំពេញអនុញ្ញាតឱ្យបងប្អូនជនមានពិការភាពអាចច្រៀងបាននៅរមណីយដ្ឋានវត្តភ្នំ។
២. ក្រសួងសង្គមកិច្ច អតីតយុទ្ធជន និងយុវនីតិសម្បទា និងសាលារាជធានីភ្នំពេញបានឯកភាពគ្នាចំពោះការបណ្ដុះបណ្ដាលជំនាញផ្សេងៗជូនដល់បងប្អូនជនមានពិការភាព។
៣. ក្រសួងសង្គមកិច្ច អតីតយុទ្ធជន និងយុវនីតិសម្បទា និងសាលារាជធានីភ្នំពេញ និងធ្វើការសម្របសម្រួលលើកទឹកចិត្តជូនបងប្អូនមានពិការភាព ទៅប្រកបមុខរបរនៅស្រុកកំណើតវិញ។
