ទីស្តីការក្រសួង ស.អ.យ. ៖ រសៀលថ្ងៃអង្គារ ១៥ កើត ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៧ ខែកញ្ញា ឆ្នាំ២០២៤ ឯកឧត្តម អុល រ៉ូ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជើញចូលរួមជាអធិបតីភាពក្នុងពិធីបើកសិក្ខាសាលាលើកកម្ពស់ការយល់ដឹង អំពីគោលនយោបាយសង្គមរបស់រាជរដ្ឋាភិបាលកម្ពុជា ដែលមានការអញ្ជើញចូលរួមពី ឯកឧត្តម លោកជំទាវ លោក លោកស្រី អគ្គនាយក អគ្គនាយករង ប្រធាននាយកដ្ឋាន ប្រធានមន្ទីរ និងមន្ត្រីនៃក្រសួង ស.អ.យ. ទាំង២៥រាជធានី ខេត្ត សរុប ១៤០នាក់ ស្រី ៤៥នាក់ ។ សិក្ខាសាលារៀបចំឡើង ក្នុងគោលបំណង៖
(១)បណ្តុះពុទ្ធិបន្ថែមដល់មន្រ្តីរាជការរបស់ក្រសួងស.អ.យ.ក្នុងការអនុវត្តគោលនយោបាយសង្គមដែលបានរៀបចំដោយក្រសួង ស្ថាប័ននានាក្រៅពីក្រសួងសង្គមកិច្ច អតីតយុទ្ធជន និងយុវនីតិសម្បទា ។
(២)ពញ្ញាក់ស្មារតីដល់សិក្ខាកាមនិងប្រតិបត្តិករ ដែលបានចូលរួមឱ្យពិនិត្យឡើងវិញនូវគោលនយោបាយពាក់ព័ន្ធនឹងវិស័យសង្គមកិច្ចឱ្យបានគ្រប់ជ្រុងជ្រោយ ដើម្បីរៀបចំផែនការអនុវត្តបានត្រឹមត្រូវ សំដៅលើកកម្ពស់ការផ្តល់សេវាសង្គមជូនប្រជាពលរដ្ឋបានកាន់តែប្រសើរ ។
(៣)ប្រមូលធាតុចូលមួយចំនួនដើម្បីទុកពិចារណាក្នុងការរៀបចំគោលនយោបាយជាតិស្តីពីសង្គមកិច្ច នៅឆ្នាំក្រោយ។
សម្រាប់គោលនយោបាយសង្គមដែលបានលើកយកមកធ្វើបទបង្ហាញដោយវាគ្មិនកិត្តិយស គឺ៖
១.ក្របខណ្ឌគោលនយោបាយជាតិគាំពារសង្គមដោយតំណាងអគ្គលេខាធិការដ្ឋានក្រុមប្រឹក្សាជាតិគាំពារសង្គម នៃក្រសួងសេដ្ឋកិច្ច និងហិរញ្ញវត្ថុ
២.គោលនយោបាយជាតិស្តីពីការគាំពារ និងអភិវឌ្ឍន៍កុមារតូច ដោយតំណាងក្រសួងអប់រំ យុវជន និងកីឡា
និង៣.គោលនយោបាយជាតិស្តីពីការអភិវឌ្ឍជនជាតិដើមភាគតិច ដោយតំណាងក្រសួងអភិវឌ្ឍន៍ជនបទ៕
