ភ្នំពេញ÷ ថ្ងៃទី២ ខែតុលា ឆ្នាំ២០២៣ លោកជំទាវ ខៀវ បូរី រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានដឹកនាំប្រតិភូក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមសិក្ខាសាលាកម្រិតខ្ពស់ ស្តីពីការពិនិត្យ និងឯកភាពលើកម្មវិធីកិច្ចសហប្រតិបត្តិការ រវាងរាជរដ្ឋាភិបាលកម្ពុជា និងអង្គការយូនីសេហ្វ សម្រាប់រយៈពេល ៥ឆ្នាំ (២០២៤-២០២៨) ក្រោមអធិបតីភាពឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងលោកបណ្ឌិត Will Park តំណាង អង្គការយូនីសេហ្វ ប្រចាំប្រទេសកម្ពុជា និងមានការ ចូលរួមពីក្រសួង ស្ថាប័ន ពាក់ព័ន្ធរួមមាន៖ ក្រសួងផែនការ ក្រសួងសុខាភិបាល ក្រសួងអប់រំ យុវជន និងកីឡា ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ, ក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហ៍កម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងបរិស្ថាន ក្រសួងមហាផ្ទៃ ក្រសួងប្រៃសណីយ៍និងទូរគមនាគមន៍ ក្រសួងអភិវឌ្ឍន៍ជនបទ ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងកិច្ចការនារី ក្រសួងធម្មការនិងសាសនា ក្រសួងយុត្តិធម៌ ក្រុមប្រឹក្សាជាតិគាំពារសង្គម និងក្រុមប្រឹក្សាជាតិកម្ពុជាដើម្បីកុមារ ព្រមទាំងតំណាងដៃគូអភិវឌ្ឍន៍ និងអង្គការមិនមែនរដ្ឋាភិបាល សរុបចំនួន ១១០នាក់។
សម្រាប់ផែនការរយៈពេល ៥ឆ្នាំ (២០២៤-២០២៨) ខាងមុខនេះ អង្គការយូនីសេហ្វ បានបេ្តជាចិត្តចូលរួមចំណែក ក្នុងការលើកកម្ពស់សិទ្ធិស្ត្រី និងកុមារនៅកម្ពុជា ដោយគាំទ្រការអនុវត្តយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាល និងគោលដៅសកលប្រកបដោយចីរភាពឆ្នាំ២០៣០។
ជាមួយគ្នានេះ អង្គការយូនីសេហ្វ និងបន្តគាំទ្រការអនុវត្តផែនការ តាមវិស័យ ដូចជា ការលុបបំបាត់អំពើហិង្សាលើកុមារ ពលកម្មកុមារ ការអប់រំគ្រប់កម្រិតដល់កុមារ ការបម្រែបម្រួលអាកាសធាតុ សុខភាព អាហារូបត្ថម្ភ និងជំនួយសង្គម អនុលោមទៅតាម ក្របខ័ណ្ឌគោលនយោបាយជាតិគាំពារសង្គមឆ្នាំ២០១៦-២០២៥៕
