ភ្នំពេញ៖ សូរសំឡេងវាយគង ទូងស្គរ ជាមួយការស្រែកជ័យឃោសបានលាន់រំពងពេញក្រសួងសង្គមកិច្ច អតីតយុទ្ធជន និងយុវនីតិសម្បទា នៅវេលាម៉ោង ៧:០០នាទីព្រឹកថ្ងៃពុធ ទី២០ ខែកញ្ញា ឆ្នាំ២០២៣។ ពិធីនេះបានរៀបចំយ៉ាងអធិកអធមក្រោមអធិបតីភាពដ៏ខ្ពង់ខ្ពស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឥស្សរជនជាថ្នាក់ដឹកនាំក្រសួង ព្រមទាំងមន្ត្រីរាជការរាប់រយនាក់នៅទីស្តីការក្រសួង។
ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានវាយគងចំនួន ៩ដង អមដោយការទូងស្គរ គ្រវីទង់ជាតិ សាសនា និងព្រះមហាក្សត្រពីសំណាក់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ដែលជាការបង្ហាញពីការចូលរួមអបអរសាទរបំផុតចំពោះព្រឹត្តិការណ៍ជាប្រវត្តិសាស្ត្រនេះ។
តំណាងរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ឯម ច័ន្ទមករា រដ្ឋលេខាធិការនិងជាអគ្គលេខាធិការក្រុមប្រឹក្សាសកម្មភាពជនពិការបានអានសាររបស់ឯកឧត្តមរដ្ឋមន្ត្រី ជា សុមេធី ដែលបានគោរពជូន សម្តេចអគ្គមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលមានខ្លឹមសារថា “ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងសង្គមកិច្ច អតីតយុទ្ធជន និងយុវនីតិសម្បទាសូមសម្ដែងនូវមនោសញ្ចេតនាសោមនស្សរីករាយឥតឧបមា និងចូលរួមអបអរសាទរយ៉ាងក្លៀវក្លាបំផុតជូនចំពោះ សម្តេចអគ្គមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសដែលគណៈកម្មាធិការបេតិកភណ្ឌពិភពលោកនៃអង្គការយ៉ូណេស្កូបានដាក់បញ្ចូល រមណីដ្ឋានប្រាសាទ កោះកេរ ទៅក្នុងបញ្ជីបេតិកភណ្ឌពិភពលោកក្នុងកិច្ចប្រជុំលើកទី៤៥ នៅទីក្រុងរីយ៉ាដ ប្រទេសអារ៉ាប៊ីសាអូឌីត នាថ្ងៃទី១៧ ខែកញ្ញា ឆ្នាំ២០២៣ ប្រកបដោយជោគជ័យ”។
ឯកឧត្តម ឯម ច័ន្ទមករា បានបន្តទៀតថា ការពិនិត្យនិងអនុម័តជាឯកច្ឆ័នចុះបញ្ជី រមណីដ្ឋានប្រាសាទកោះកេរ នៅក្នុងបេតិកភណ្ឌពិភពលោកនៅពេលនេះ បន្ទាប់ពីកម្ពុជាបានស្នើទៅអង្គការយូណេស្កូតាំងពីឆ្នាំ២០១៨មកម្ល៉េះ តាមរយៈក្រសួងវប្បធម៌និងវិចិត្រសិល្បៈ។ ប្រការនេះបានបង្ហាញពីការទទួលស្គាល់នូវតម្លៃលេចធ្លោជាសកលតាមរយៈលក្ខណៈវិនិច្ឆ័យទី២ និងទី៤ ព្រមទាំង ទទួលស្គាល់ថា រមណីយដ្ឋានប្រាសាទកោះកេរ រក្សាបាននូវភាព integrity និងAuthenticity ពេញលេញដែលជាកំពូលស្នាដៃដ៏មហស្ចារ្យនៃស្ថាបត្យកម្មខ្មែរ និងមានតម្លៃសកលដ៏ចំណាន ស្តែងចេញពីការខិតខំប្រឹងប្រែងរបស់រាជរដ្ឋាភិបាលកម្ពុជាដែលដឹកនាំដោយអតីត នាយករដ្ឋមន្ត្រីនៃព្រះរាជាណាចក្រកម្ពុជា សម្តេចអគ្គមហាសេនាបតីតេជោ ហ៊ុន សែន ក្នុងការស្វះស្វែងនាំមកជូនប្រជាជនកម្ពុជា នូវសុខសន្តិភាព ការបង្រួបបង្រួមជាតិ ភាពសុខដុមរមនា ក៏ដូចជាការដឹកនាំកសាងអភិវឌ្ឍជាតិលើគ្រប់វិស័យ រួមទាំងការអភិរក្ស ការអភិវឌ្ឍសម្បត្តិវប្បធម៌ និងប្រពៃណី ដែលមិនអាចកាត់ថ្លៃបានរបស់ប្រជាជនកម្ពុជាយើងនិងជាមោទនភាពជាតិដ៏ធំធេងថ្មីមួយទៀត។
ក្នុងឱកាស ឯកឧត្តម ឯម ច័ន្ទមករា ក្នុងនាមឯកឧត្តមរដ្ឋមន្ត្រី ជា សុមេធី និងថ្នាក់ដឹកនាំក្រសួងទាំងអស់ក៏បានបួងសួងដល់ទេវតាថែរក្សាទឹកដី នៃព្រះរាជាណាចក្រកម្ពុជា គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិទាំងឡាយក្នុងលោកប្រោះព្រំសព្ទសាធុការគោពជូន សម្តេចអគ្គមហាបវរធិបតី និង លោកជំទាវ ព្រមទាំងបុត្រា បុត្រីជាទីស្រឡាញ់ សូមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
