![](https://mosvy.gov.kh/wp-content/uploads/2023/10/505A2242-3000x2000.jpg)
តំណាងរដ្ឋមន្ត្រីក្រសួងសង្គមកិច្ចចូលរួមក្នុងពិធីសំណេះសំណាលជាមួយកម្មករនិយោជិត នៅតាមរោងចក្រ សហគ្រាស នៅខណ្ឌដង្កោ និងខណ្ឌមានជ័យ
ភ្នំពេញ៖ នៅព្រឹកថ្ងៃអង្គារ៍ ទី៣ ខែតុលា ឆ្នាំ២០២៣ តំណាងដ៏ខ្ពង់ខ្ពស់របស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ឯម ច័ន្ទមករា បានអញ្ជើញចូលរួមក្នុងពិធីសំណេះសំណាលជាមួយកម្មករនិយោជិត នៅតាមរោងចក្រ សហគមន៍នៅខណ្ឌដង្កោ និងខណ្ឌមានជ័យ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
កម្មវិធីនៅខណ្ឌមានជ័យ រាជធានីភ្នំពេញនាព្រឹកនេះ មានបងប្អូនកម្មករនិយោជិតចូលរួមចំនួន ១៨ ០៩៩នាក់ ដែលមានស្ត្រីមានផ្ទៃពោះ មានចំនួន ៦៨៩នាក់ មកពី ២២រោងចក្រ ក្នុងនោះរោងចក្រកាត់ដេរចំនួន១៨ ផលិតផលធ្វើដំណើរ និងកាបូប ចំនួន២ ដេរស្បែកជើងចំនួន១ និងរោងចក្រផលិតឆ័ត្រ ចំនួន១។
*** ប្រសាសន៍ដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត ដែលពាក់ព័ន្ធ នឹងក្រសួងសង្គមកិច្ចរួមមាន៖
១-ការអនុវត្តរបស់រាជរដ្ឋាភិបាលចំពោះការអនុវត្តប្រព័ន្ធជំនួយសង្គមដែលឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ គ្រួសារក្រីក្រ និងងាយរងគ្រោះក្នុងកំឡុងពេលប្រយុទ្ធនឹងជំងឺកូវីដ-១៩ និងគ្រួសាររងហានិភ័យដែលរងផលប៉ះពាល់ធ្ងន់ធ្ងរពីគ្រោះទឹកជំនន់។
២-ករណីស្ថានឯកអគ្គរាជទូតកម្ពុជាប្រចាំប្រទេសឡាវ បានជួយសង្គ្រោះស្ត្រីខ្មែរចំនួន ៦នាក់ ដែលត្រូវបានជនខិលខូចបោកប្រាស់ទៅធ្វើការនៅខេត្តបកែ ប្រទេសឡាវ។
ក្នុងឱកាសនោះ សម្តេចបវរធិបតី ហ៊ុន ម៉ាណែត បានណែនាំដល់គ្រប់ក្រសួងស្ថាប័នរកឱ្យឃើញនូវបញ្ហាមុន (ករណីអសកម្ម) មុនសម្តេចបវរធិបតី បញ្ជូនទៅគ្រប់រដ្ឋមន្ត្រី ឬប្រធានស្ថាប័នល្អជាង។ និងបានណែនាំឱ្យត្រូវធ្វើការបកស្រាយជូនប្រជាជនភ្លាមៗ ហើយតាមយកចិត្តទុកដាក់ដោះស្រាយលើការគ្រប់កិច្ចការតាមសាមីក្រសួង-ស្ថាប័ន។ គ្រប់ស្ថាប័នរួមគ្នាធ្វើដោយមិនត្រូវឱ្យនាយករដ្ឋមន្ត្រីធ្វើជាអ្នកនាំពាក្យរបស់ក្រសួង ស្ថាប័នឡើយ។
នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ថាសម្ដេចមិនបានសម្រាកនោះទេរហូតដល់ម៉ោង ១២កណ្ដាលយប់ ក៏ព្រោះសម្ដេចនៅតែតាមដានអំពីព័ត៌មាន និងបញ្ហាប្រឈមរបស់ប្រជាពលរដ្ឋប្រចាំថ្ងៃ។
សម្ដេចបានលើកឡើង ថាសម្ដេចបានទទួលដឹងព័ត៌មានទាំងអស់ក៏ប៉ុន្តែសម្ដេចនិងលូកដៃទៅក្នុងអង្គភាពជំនាញនោះទេគ្រាន់តែបញ្ជាឲ្យអង្គភាពទាំងនោះពិនិត្យ។
ថ្លែងក្នុងជំនួបជាមួយកម្មករជិត ២ម៉ឺននាក់ក្នុងរាជធានីភ្នំពេញ ព្រឹកថ្ងៃអង្គារ៍ ទី៣ ខែតុលា សម្ដេចធិបតី ហ៊ុន ម៉ាណែត បានថ្លែងថា មានការងារមួយចំនួនសម្ដេចធ្វើផ្ទាល់ និងមួយចំនួនទៀតសម្ដេចបានបញ្ជាពីលើទៅអង្គភាពជំនាញឲ្យពិនិត្យ ពន្យល់ និងបកស្រាយ។ សម្ដេចថានេះជាការធ្វើនយោបាយរបស់សម្ដេចដោយតម្រូវឲ្យអង្គភាពជំនាញត្រូវមានទំនួលខុសត្រូវលើការងារខ្លួន និងពលរដ្ឋ។
សម្ដេចថា៖ «ទោះខ្ញុំមិនចេញធ្វើផ្ទាល់ខ្ញុំតាមដានរហូតអាជ្ញាធរពាក់ព័ន្ធត្រូវតែធ្វើ»។
សម្ដេចបានលើកឡើងថា មានការងារជាច្រើនដែលសម្ដេចបានធ្វើទាក់ទងទៅនឹងបញ្ហាពន្ធដារ បញ្ហានៃការលួចចម្លងប្រាសាទអង្គរវត្ត បញ្ហានៃការតវ៉ារវាងប្រជាពលរដ្ឋនៅតាមបណ្ដាខេត្តមួយចំនួន ដែលទាំងអស់នេះសម្ដេចទុកឱកាសឲ្យស្ថាប័នជំនាញធ្វើការដោះស្រាយនិងបកស្រាយទៅកាន់ប្រជាពលរដ្ឋ។
នាយករដ្ឋមន្ត្រីកម្ពុជា សម្ដេចអធិបតី ហ៊ុន ម៉ាណែត នឹងអាចមានវិធានការថ្មីទាក់ទងជាមួយនឹងការបន្ធូរបន្ថយពន្ធដារសម្រាប់អ្នករកស៉ីបន្ទាប់ពីបានជួបជាមួយអ្នករកស៉ីនៅខែវិច្ឆិការួច។
ថ្លែងក្នុងជំនួបជាមួយកម្មករជិត ២ម៉ឺននាក់ក្នុងរាជធានីភ្នំពេញ ព្រឹកថ្ងៃអង្គារ៍ ទី៣ ខែតុលា សម្ដេចធិបតី ហ៊ុន ម៉ាណែត បានលើកឡើងថារឿងពន្ធនេះសម្ដេចធិបតីបានគិតតាំងពីដើមអាណត្តិរួចមកហើយ ដោយគ្រាន់តែរង់ចាំពេលវេលាសមស្របមួយប៉ុណ្ណោះ។
ជាមួយគ្នានេះសម្ដេចធិបតីបានបញ្ជាក់ថារដ្ឋាភិបាលថ្មីនឹងមិនបង្កើតពន្ធថ្មី ឬតម្លើងពន្ធដែលមានស្រាប់នោះទេ៕
![](https://mosvy.gov.kh/wp-content/uploads/2023/10/photo_2023-10-03_13-16-38.jpg)
![](https://mosvy.gov.kh/wp-content/uploads/2023/10/photo_2023-10-03_13-16-40.jpg)
![](https://mosvy.gov.kh/wp-content/uploads/2023/10/photo_2023-10-03_13-01-31.jpg)
![](https://mosvy.gov.kh/wp-content/uploads/2023/10/photo_2023-10-03_13-16-50.jpg)
![](https://mosvy.gov.kh/wp-content/uploads/2023/10/photo_2023-10-03_13-16-44.jpg)
![](https://mosvy.gov.kh/wp-content/uploads/2023/10/photo_2023-10-03_13-01-33.jpg)
![](https://mosvy.gov.kh/wp-content/uploads/2023/10/photo_2023-10-03_13-16-46.jpg)
![](https://mosvy.gov.kh/wp-content/uploads/2023/10/photo_2023-10-03_13-16-48.jpg)
![](https://mosvy.gov.kh/wp-content/uploads/2023/10/photo_2023-10-03_13-16-52.jpg)
![](https://mosvy.gov.kh/wp-content/uploads/2023/10/photo_2023-10-03_13-16-55.jpg)
![](https://mosvy.gov.kh/wp-content/uploads/2023/10/photo_2023-10-03_13-17-00.jpg)
![](https://mosvy.gov.kh/wp-content/uploads/2023/10/photo_2023-10-03_13-17-02.jpg)
![](https://mosvy.gov.kh/wp-content/uploads/2023/10/photo_2023-10-03_13-17-05.jpg)
![](https://mosvy.gov.kh/wp-content/uploads/2023/10/photo_2023-10-03_13-17-14.jpg)