ព្រៃវែង៖ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និង ជាប្រធានក្រុមការងាររាជរដ្ឋាភិបាលចុះមូលដ្ឋានស្រុកពាមជរ ខេត្តព្រៃវែង បានមានប្រសាសន៍ណែនាំដល់សមាជិកក្រុមការងាររាជរដ្ឋាភិបាលចុះមូលដ្ឋានស្រុកពាមជរ ខេត្តព្រៃវែង ឱ្យខិតខំប្រឹងប្រែងបំពេញភារកិច្ចរបស់ខ្លួនតាមសេចក្តីណែនាំរបស់រាជរដ្ឋាភិបាលលេខ០៤សណន ចុះថ្ងៃទី៣០ ខែវិច្ឆិកា ឆ្នាំ២០២៣ ដោយសហការល្អជាមួយរដ្ឋបាលឃុំទាំង១០ និង តាមបណ្តាភូមិទាំង៥០ នៃស្រុកពាមជរ និងត្រូវខិតខំយកចិត្តទុកដាក់ដោះស្រាយនូវរាល់បញ្ហាលំបាក និងសំណូមពរចំបាច់នានារបស់ប្រជាពលរដ្ឋនៅមូលដ្ឋាន ដើម្បីជម្រុញដល់ការអនុវត្តយុទ្ធសាស្ត្របញ្ចកោណ ដំណាក់កាលទី១ និង គោលនយោបាយអាទិភាពនានារបស់រាជរដ្ឋាភិបាលអាណត្តិទី៧។
មានប្រសាសន៍ណែនាំបែបនេះ ក្នុងឱកាសដែលឯកឧត្តម បានអញ្ជើញជាអធិបតីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋាននៅស្រុកពាមជរ ដែលបានប្រព្រឹត្តិទៅ នាព្រឹកថ្ងៃទី២៧ ខែមករា ឆ្នាំ២០២៤ នៅសាលាស្រុកពាមជរ។
