ខេត្តសៀមរាប ៖ ព្រឹកថ្ងៃព្រហស្បតិ៍ ៥កើត ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៤ ខែមីនា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម ជា សុមេធី រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម តូច ចាន់នី រដ្ឋលេខាធិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតី បិទសិក្ខាសាលាពិគ្រោះយោបល់ស្តីពី ការពង្រឹងការថែទាំជំនួស និងកិច្ចការពារកុមារនៅកម្ពុជា ។
សិក្ខាសាលានេះបានរៀបចំឡើងដោយអង្គការជីវិតនៅកម្ពុជា សហការជាមួយនឹងអង្គការចំនួន៦ (អង្គការម្លប់ឫស្សី អង្គការហូលថ៍អន្តរជាតិ អង្គការកុមារក្នុងគ្រួសារ អង្គការជំហានដំបូងកម្ពុជា អង្គការម្លប់តាប៉ាង និងមន្ទីរពេទ្យកុមារ) នៅសណ្ឋាគារអង្គរប៉ារ៉ាឌី ដោយមានការចូលរួមពីឯកឧត្តមក្រុមប្រឹក្សាខេត្ត លោកជំទាវប្រធានគ.ក.ស.ក នៃរដ្ឋបាលខេត្ត លោក លោកស្រីប្រធាននាយកដ្ឋានជំនាញ និងមន្ទីរសង្គមកិច្ច អតីតយុទ្ធជន និងយុវនីតិសម្បទា ចំនួន ៦ (ខេត្តសៀមរាប ខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តកំពង់ធំ និងខេត្តព្រះសីហនុ) ព្រមទាំងអង្គការដៃគូអភិវឌ្ឍន៍ សរុបអ្នកចូលរួមចំនួន ៩០នាក់ ស្រី ៣៨នាក់។
ឯកឧត្តម តូច ចាន់នី បានផ្តល់នូវអនុសាសន៍ និងសំណូមពរជូនអង្គពិធីដូចតទៅ៖
១-ស្នើដល់មូលនិធិ GHR ពិចារណាបន្តគាំទ្រមូលនិធិដល់អង្គការដៃគូ រួមទាំងរដ្ឋាភិបាល ក្នុងលើការលើកកម្ពស់ការថែទាំនៅតាមគ្រួសារសហគមន៍ ស្របតាមផែនការស្តីពីការធ្វើឱ្យឡើងនូវការថែទាំជំនួសចំពោះកុមារ ឆ្នាំ២០២៣-២០២៧ និងផែនការអនុវត្តយុទ្ធសាស្ត្រវិស័យកិច្ចការពារកុមារ ២០២២-២០២៦។
២- ស្នើដល់មូលនិធិ GHR និងអង្គការដៃគូជាតិ អន្តរជាតិ ចូលរួមគាំទ្រដល់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងការដំណើរការរៀបចំប្រព័ន្ធ និងយន្តការអភិវឌ្ឍកម្លាំងសង្គមនៅកម្ពុជា ដើម្បីជាធនធាន និងបង្កើនប្រសិទ្ធភាពក្នុងការផ្តល់សេវាកិច្ចការពារកុមារនៅកម្ពុជា។
៣- ស្នើដល់អង្គការដៃគូ ក៏ដូចជាម្ចាស់ជំនួយបន្តគាំទ្រដល់ការអនុវត្តកម្មវិធី គោលនយោបាយ និងលិខិតបទដ្ឋានគតិយុត្តពាក់ព័ន្ធនឹងការថែទាំជំនួសចំពោះកុមារ ជាពិសេសគោលនយោបាយស្តីពីការថែទាំជំនួសចំពោះកុមារដែលបានកែសម្រួលថ្មី និងការកែសម្រួលគតិយុត្តផ្សេងៗទៀត ដូចជា នីតិវិធីអនុវត្តគោលនយោបាយថែទាំជំនួសចំពោះកុមារ និងបទដ្ឋានអប្បបរមាសម្រាប់ការថែទាំជំនួស។
៤- ចូលរួមលើកកម្ពស់ការថែទាំជំនួសចំពោះកុមារនៅតាមគ្រួសារ តាមរយៈជំរុញការអនុវត្តកម្មវិធីថែទាំដោយសាច់ញាតិ គ្រួសារធម៌ និងទុកដាក់អចិន្ត្រៃយ៍តាមរយៈស្មុំកូនក្នុងប្រទេស និងអន្តរប្រទេស។
៥- ចូលរួមលើកកម្ពស់ការផ្សព្វផ្សាយ និងការអនុវត្តនីតិវិធីប្រតិបត្តិកិច្ចការពារកុមារសម្រាប់រដ្ឋបាលក្រុង ស្រុក ខណ្ឌ ដែលក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងមហាផ្ទៃបានដាក់អនុវត្តថ្មីៗនេះ។
៦- ស្នើដល់រដ្ឋបាលខេត្ត គ.ក.ស.ក ខេត្ត មន្ទីរ ស.អ.យ និងអាជ្ញាធរពាក់ព័ន្ធបន្តគាំទ្រ និងផ្តល់កិច្ចសហការ ព្រមទាំងធ្វើការរួមគ្នា ដើម្បីឱ្យការផ្តល់សេវាការថែទាំជំនួស និងកិច្ចការពារកុមារ កាន់តែមានប្រសិទ្ធភាពបន្ថែមទៀត។
៧- បន្តឱ្យមានរបៀបវារៈជួបជុំរវាងអង្គការដៃគូ ម្ចាស់ជំនួស និងស្ថាប័នរដ្ឋាភិបាល ដើម្បីចែករំលែកបទពិសោធន៍ ការអនុវត្តល្អ បញ្ហាប្រឈម និងស្វែងរកដំណោះស្រាយរួមគ្នា ដើម្បីឱ្យការផ្តល់សេវាឆ្លើយតបទៅនឹងតម្រូវការរបស់កុមារ និងមានស័ក្តិសិទ្ធិភាព។
