ខេត្តកំពង់ឆ្នាំង ៖ ថ្ងៃពុធ ១១កើត ខែផល្គុន ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២០ ខែមីនា ឆ្នាំ២០២៤ ឯកឧត្តម ម៉ែន សុចិត្រ រដ្ឋលេខាធិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមជាអធិបតីបិទសិក្ខាសាលាផ្សព្វផ្សាយកម្មវិធីស្មុំកូនក្នុងប្រទេស “ដល់មន្ត្រីសង្គមកិច្ច បុគ្គលិកសង្គម និងអ្នកពាក់ព័ន្ធ ក្នុងខេត្តកំពង់ឆ្នាំង” ដែលរៀបចំឡើងដោយនាយកដ្ឋានកិច្ចការពារកុមារ នៃអគ្គនាយកដ្ឋានសេវាសង្គមកិច្ច ដោយមានការគាំទ្រពីអង្គការហូលថ៌អន្តរជាតិ។
នាឱកាសនោះ ឯកឧត្តមរដ្ឋលេខាធិការបានកោតសរសើរ និងវាយតម្លៃចំពោះការរៀបចំសិក្ខាសាលាដ៏មានសារៈសំខាន់នេះ ដែលធ្វើឱ្យមន្រ្តីសង្គមកិច្ច បុគ្គលិកសង្គម និងអាជ្ញាធរមានសមត្ថកិច្ចបានយល់កាន់តែច្បាស់អំពីច្បាប់ គោលនយោបាយ នីតិវិធី គោលការណ៍ លក្ខណៈវិនិច្ឆ័យកុមារជាកម្មវត្ថុស្មុំកូន ដំណើរការស្មុំកូន និងសេវាក្រោយស្មុំកូន ដើម្បីធានានូវសិទ្ធិជាមូលដ្ឋាន និងឧត្តមប្រយោជន៍របស់កុមារ។
