ទីស្ដីការក្រសួង ៖ នាថ្ងៃទី៨ ខែមេសា ឆ្នាំ២០២៤ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន បានអញ្ជើញជាអធិបតីដ៏ខ្ពង់ខ្ពស់ក្នុងពិធីសូត្រមន្តសង្ក្រាន្ដ និងពិសារអាហារសាមគ្គី អបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ ដែលនឹងឈានចូលមកដល់នាពេលខាងមុខនេះ។
ពិធីនេះមានវត្តមានចូលរួមពី ឯកឧត្ដម លោកជំទាវ លោក លោកស្រី និងមន្រ្តីរាជការទាំងអស់ នៃក្រសួងសង្គមកិច្ច អតីតយុទ្ធជន និងយុវនីតិសម្បទា នៅទីស្ដីការក្រសួង។
តាមការគ្រោងទុកកម្មវិធីបានប្រព្រឹត្តទៅក្រោមបរិយាកាសដ៏រីករាយ និងស្និទ្ធស្នាលបំផុត រួមមាន ពិធីសូត្រមន្ដចម្រើនព្រះបរិត្ត ការសម្ដែងរបាំត្រុដិ ការលេងល្បែងប្រជាប្រិយខ្មែរ ពិសារអាហារសាមគ្គី និងមានការចាប់រង្វាន់ផងដែរ៕
